ງານວາງສະແດງຂອງອົງການຈັດຕັ້ງສັງຄົມ ຢູ່ຫຼວງພະບາງສ້າງຜົນກະທົບທີ່ດີຕໍ່ຊຸມຊົມ
ໃນອາທິດທີ່ຜ່ານມາ ທີ່ນະຄອນຫຼວງພະບາງ, ງານວາງສະແດງຜົນງານ ແລະ ຜະລິດຕະພັນຂອງອົງການຈັດຕັ້ງສັງຄົມລາວພາກເໜືອໄດ້ສຳເລັດຢ່າງສົມບູນ, ເຊິ່ງໄດ້ມີອົງການຈັດຕັ້ງສັງຄົມ (CSOs) ຈໍານວນຫຼາຍ ໄດ້ນໍາສະເໜີຜົນງານ ແລະ ຜະລິດຕະພັນກ່ຽວກັບຜົນກະທົບດ້ານບວກທີ່ມີຕໍ່ຊຸມຊົນ.
ງານວາງສະແດງດັ່ງກ່າວໄດ້ມີຜູ້ເຂົ້າທ່ຽວຊົມຈຳນວນຫຼາຍ, ເຊິ່ງໄດ້ຮຽນຮູ້ເຖິງວຽກງານອົງການຈັດຕັ້ງສັງຄົມໃນການປະກອບສ່ວນໃນການພັດທະນາປະເທດລາວ. ຢູ່ໃນງານໄດ້ມີການວາງສະແດງສິນຄ້າທີ່ຫຼາກຫຼາຍ, ການສະແດງວັດທະນະທຳ, ຜະລິດຕະພັນຈາກຊຸມຊົນ, ແລະ ການສົນທະນາແລກປ່ຽນກ່ຽວກັບຫົວຂໍ້ຕ່າງໆເຊັ່ນວ່າ: ສຸຂະພາບ, ສິ່ງແວດລ້ອມ, ແລະ ການພັດທະນາຊຸມຊົນ. ນອກນັ້ນ, ຜູ້ເຂົ້າທ່ຽວຊົມ ແລະ ນັກສຶກສາຍັງໄດ້ຮ່ວມກິດຈະກຳຖາມ-ຕອບ ເພື່ອຮຽນຮູ້ເພີ່ມເຕີມກ່ຽວກັບວຽກງານພັດທະນາຊຸມຊົນທີ່ກໍາລັງດໍາເນີນຢູ່. ️
ວຽກງານນີ້ແມ່ນໄດ້ຮັບການສະໜັບສະໜູນຈາກແຜນງານທີມເອີຣົບ "CEGGA II" ເຊິ່ງເປັນການສົ່ງເສີມການພັດທະນາແບບຍືນຍົງ ແລະ ສ້າງຄວາມເຂັ້ມແຂງໃຫ້ແກ່ຊຸມຊົນໂດຍຜ່ານອົງການຈັດຕັ້ງສັງຄົມ. ໃນໄລຍະ 2 ນີ້, ແຜນງານ CEGGA II ໄດ້ມອບທຶນຂະໜາດນ້ອຍໃຫ້ແກ່ 23 ອົງການຈັດຕັ້ງສັງຄົມລາວ ເພື່ອຈັດຕັ້ງປະຕິບັດໂຄງການພັດທະນາຊຸມຊົນ. ແຜນງານດັ່ງກ່າວໄດ້ຮັບທຶນສະໜັບສະໜູນຈາກຄູ່ຮ່ວມງານທີມເອີຣົບ ເຊິ່ງປະກອບມີປະເທດສະວິດເຊີແລນ, ເຢຍລະມັນ, ແລະ ສະຫະພາບເອີຣົບ, ແລະ ຈັດຕັ້ງປະຕິບັດໂດຍ GIZ.