ຈາກກິດຈະກຳໃນເວລາຫວ່າງສູ່ອາຊີບທີ່ສ້າງລາຍໄດ້: ແຮງບັນດາໃຈຈາກເລື່ອງຂອງແມ່ວັນດີ
ແມ່ວັນດີ, ອາຍຸ 61 ປີ, ໄດ້ປ່ຽນກິດຈະກຳທີ່ລາວມັກເປັນອາຊີບທີ່ສາມາດສ້າງລາຍໄດ້. ຈາກທີ່ເຄີຍເປັນພຽງສິ່ງທີ່ມັກເຮັດໃນເວລາຫວ່າງ, ປັດຈຸບັນການຕ່ຳຫູກໄດ້ກາຍເປັນແຫຼ່ງລາຍຮັບຫຼັກຂອງແມ່ວັນດີ, ເຊິ່ງສ່ວນໜຶ່ງແມ່ນມາຈາກການສະໜັບສະໜູນຂອງແຜນງານ CEGGA II.
ແມ່ວັນດີ ມາຈາກບ້ານປ່າກ້ວຍ, ແຂວງ ສະຫວັນນະເຂດ. ແມ່ວັນດີໄດ້ໃຊ້ເວລາສ່ວນຫຼາຍໃນການເຮັດນາ ແລະ ຕ່ຳແຜ່ນແພພື້ນເມືອງ. ຢ່າງໃດກໍຕາມ, ການຕ່ຳຫູກເປັນພຽງແຕ່ສິ່ງທີ່ລາວມັກເຮັດໃນເວລາຫວ່າງ, ເຊິ່ງລາວມັກເຮັດຫຼັງຈາກແລ້ວວຽກໄຮ່ນາ. ລາວບໍ່ເຄີຍຄິດວ່າມັນຈະສາມາດເຮັດເປັນອາຊີບໄດ້. ແຕ່ເມື່ອອາຍຸຫຼາຍຂື້ນ ການປູກຝັງເຮັດນາກໍມີຄວາມຫຍຸ້ງຍາກຫຼາຍຂຶ້ນ, ແມ່ວັນດີຈຶ່ງຕ້ອງຫາວິທີໃໝ່ເພື່ອຫາລ້ຽງຕົວເອງ.
ການປ່ຽນແປງໄດ້ເກີດຂື້ນໃນຕົ້ນປີ 2024 ເມື່ອສະມາຄົມພັດທະນາຊຸມຊົນ (CoDA) ໄດ້ຮັບທຶນຂະໜາດນ້ອຍຈາກແຜນງານ CEGGA II ເພື່ອຈັດຕັ້ງປະຕິບັດໂຄງການສ້າງຄວາມເຂັ້ມແຂງໃຫ້ແກ່ຊຸມຊົນ. ຫນຶ່ງໃນກິດຈະກໍາຫຼັກຂອງໂຄງການແມ່ນການສົ່ງເສີມວຽກງານຕ່ຳຫູກພື້ນເມືອງໃນບ້ານປ່າກ້ວຍ. ໂຄງການດັ່ງກ່າວໄດ້ສະໜອງອຸປະກອນຖັກແສ່ວໃໝ່ໃຫ້ແກ່ແມ່ວັນດີ ແລະ ເຊື່ອມຕໍ່ກັບກຸ່ມຕ່ຳຫູກທ້ອງຖິ່ນ, ເຊິ່ງໄດ້ເປິດປະຕູສູ່ໂອກາດໃໝ່ໆ.
ດ້ວຍການຊ່ວຍເຫຼືອນີ້, ແມ່ວັນດີ ແລະ ກຸ່ມຕ່ຳຫູກໄດ້ເລີ່ມເຊື່ອມຕໍ່ກັບບັນດາວິສາຫະກິດ ແລະ ທຸລະກິດທ້ອງຖິ່ນ, ເຊິ່ງໄດ້ເປີດການເຂົ້າເຖິງຕະຫຼາດຫຼາຍຂື້ນ. ປະຈຸບັນ, ແຜ່ນແພຂອງເຂົາເຈົ້າໄດ້ວາງຂາຍຢູ່ຕະຫຼາດໃນແຂວງສະຫວັນນະເຂດ ແລະ ສາມາດດຶງດູດລູກຄ້າຫຼາຍກວ່າແຕ່ກ່ອນ. ແມ່ວັນດີກ່າວວ່າ: "ຂ້ອຍບໍ່ເຄີຍເຊື່ອວ່າການຕ່ຳຫູກສາມາດເຮັດເປັນລາຍຮັບຫຼັກໄດ້. ການຊ່ວຍເຫຼືອນີ້ໄດ້ປ່ຽນແປງຊີວິດຂອງຂ້ອຍ. ຕອນນີ້ຂ້ອຍສາມາດຫາເງິນ ແລະ ມີວຽກເຮັດ, ໃນຂະນະດຽວກັນກໍ່ຮັກສາວັດທະນະທໍາຂອງພວກເຮົາ ແລະ ແບ່ງປັນໃຫ້ກັບຄົນອື່ນ." ແມ່ວັນດີຍັງໄດ້ໃຫ້ກຳລັງໃຈຜູ້ອື່ນບໍ່ໃຫ້ຍອມແພ້, ແລະ ບອກວ່າມັນບໍ່ເຄີຍຊ້າເກີນໄປທີ່ຈະເລີ່ມເຮັດສິ່ງໃຫມ່ໆ.
ແມ່ວັນດີແມ່ນພຽງແຕ່ຫນຶ່ງໃນຫຼາຍໆຄົນທີ່ໄດ້ຮັບຜົນປະໂຫຍດຈາກແຜນງານ CEGGA II. ໃນໄລຍະ II ນີ້, ແຜນງານດັ່ງກ່າວໄດ້ມອບທຶນຂະຫນາດນ້ອຍໃຫ້ແກ່ 23 ອົງການຈັດຕັ້ງສັງຄົມ, ລວມທັງ ສະມາຄົມພັດທະນາຊຸມຊົນ (CoDA), ເພື່ອສ້າງຄວາມເຂັ້ມແຂງໃຫ້ຊຸມຊົນ. ແຜນງານ CEGGA II ໄດ້ຮັບທຶນສະໜັບສະໜູນຈາກຄູ່ຮ່ວມງານທີມເອີຣົບ ເຊິ່ງປະກອບມີ: ປະເທດສະວິດເຊີແລນ, ເຢຍລະມັນ, ສະຫະພາບເອີຣົບ, ແລະ ຈັດຕັ້ງປະຕິບັດໂດຍ GIZ.