ການແກ້ໄຂການເສື່ອມໂຊມຂອງປ່າ ໃນພາກເໜືອຂອງລາວ: ເສັ້ນທາງສູ່ການຟື້ນຟູແບບຍືນຍົງ
ທ່ານລອງຈິນຕະນາການເບິ່ງວ່າ ພູມິທັດທີ່ເຄີຍເຕັມໄປດ້ວຍພືດ ແລະ ສັດປ່າຫຼາກຫຼາຍຊະນິດ, ບັດນີ້ກາຍເປັນພຽງທົ່ງກວ້າງ ໄວ້ພຽງເພື່ອລ້ຽງສັດ. ໃນຊ່ວງປີທີ່ຜ່ານມາ, ພາກເໜືອຂອງລາວ ໄດ້ປະເຊີນກັບການເສື່່ອມໂຊມຂອງປ່າ ເນື່ອງຈາກການຂະຫຍາຍຕົວຂອງການເຮັດກະສິກຳ, ການຖາງປ່າເຮັດໄຮ່ແບບເລືອນລອຍ, ແລະ ການໃຊ້ພື້ນທີ່ດິນເປົ່າຫວ່າງເປັນທົ່ງນາ. ສິ່ງນີ້ໄດ້ສ້າງຄວາມສູນເສຍຢ່າງຮ້າຍແຮງເຊັ່ນ ການສູນເສຍສັດປ່າ, ການກັດເຊາະຂອງດິນ ແລະ ການຂາດແຄນນໍ້າ ທີ່ສົ່ງຜົນກະທົບຕໍ່ຊຸມຊົນທ້ອງຖິ່ນ ທີ່ພຶງພາປ່າໄມ້. ຊຸມຊົນທ້ອງຖິ່ນ, ໂດຍສະເພາະຜູ້ທີ່ເພິ່ງພາຊັບພະຍາກອນປ່າໄມ້ ໃນການດຳລົງຊີວິດ ແມ່ນໄດ້ຮັບຜົນກະທົບຢ່າງຮຸນແຮງຈາກການປ່ຽນແປງດັ່ງກ່າວ ແລະ ກຳລັງຊອກຫາວິທີແກ້ໄຂປັນຫາໄລຍະຍາວ ສຳລັບການຈັດການພູມິທັດປ່າ.
ເພື່ອແກ້ໄຂຄວາມທ້າທາຍນີ້, ສອງໂຄງການ ທີ່ຈັດຕັ້ງປະຕິບັດໂດຍ GIZ ຄື ໂຄງການ ການປົກປັກຮັກສາ ແລະ ນໍາໃຊ້ລະບົບນິເວດປ່າໄມ້ ແລະ ຊີວະນາໆພັນ ແບບຍືນຍົງ (ProFEB), ດຳເນີນການໂດຍ ໂຄງການປ້ອງກັນສະພາບອາກາດຜ່ານການເລີກຕັດໄມ້ທຳລາຍປ່າ (CliPAD), ໄດ້ຮ່ວມມືກັນແກ້ໄຂບັນຫາການເສື່ອມໂຊມຂອງປ່າ ໃນພາກເໜືອຂອງ ສປປ ລາວ. ການຝຶກອົບຮົມໄດ້ຈັດຂຶ້ນຢູ່ ແຂວງຫົວພັນ, ໄຊຍະບູລີ ແລະ ແຂວງຫຼວງພະບາງ. ການຝຶກອົບຮົມໄດ້ເນັ້ນໜັກໃສ່:
- ການແນະນຳຫຼັກການ ແລະ ແນວຄິດຂອງການຟື້ນຟູປ່າໄມ້ແບບພູມິທັດ
- ການປະເມີນທາງລະບົບນິເວດ ແລະ ການວາງແຜນການຟື້ນຟູ
- ການເລືອກພັນໄມ້ສຳລັບການຟື້ນຟູປ່າໄມ້ແບບພູມິທັດ ແລະ ເຄື່ອງມືການຟື້ນຟູທີ່ຫຼາກຫຼາຍ
- ການເລືອກເຕັກນິກການຟື້ນຟູທີ່ເໝາະສົມ (ຕົວຢ່າງ, ການຟື້ນຟູທາງທຳມະຊາດ, ການປູກປ່າເພີ່ມ, ການດູແລປ່າໄມ້, ການອະນຸຮັກດິນ ແລະ ນໍ້າ)
- ການມີສ່ວນຮ່ວມຂອງຊຸມຊົນ ແລະ ການມີສ່ວນຮ່ວມຂອງຜູ້ມີສ່ວນກ່ຽວຂ້ອງ ໃນການຟື້ນຟູປ່າໄມ້ແບບພູມິທັດ
- ການຕິດຕາມ ແລະ ປະເມີນຜົນສໍາເລັດຂອງການຟື້ນຟູ
- ກໍລະນີສຶກສາຂອງໂຄງການຟື້ນຟູປ່າໄມ້ແບບພູມິທັດ ທີ່ປະສົບຄວາມສໍາເລັດໃນພາກພື້ນ
ການຝຶກອົບຮົມນີ້ອອກແບບເພື່ອໃຫ້ຜູ້ເຂົ້າຮ່ວມມີຄວາມຮູ້, ທັກສະ, ແລະ ຊັບພະຍາກອນທີ່ຈຳເປັນໃນການວາງແຜນ, ດຳເນີນການ, ແລະ ຕິດຕາມການຟື້ນຟູປ່າໄມ້ແບບພູມິທັດໄດ້ຢ່າງມີປະສິດທິພາບ. ໂດຍການເພີ່ມຄວາມສາມາດໃຫ້ກັບຜູ້ມີສ່ວນຮ່ວມ,ເປົ້າໝາຍທີ່ຈະແກ້ໄຂການເສື່ອມໂຊມຂອງປ່າ, ສົ່ງເສີມ ສິ່ງແວດລ້ອມທີ່ດີ, ແລະ ປັບປຸງຄວາມກ້າວໜ້າຂອງຊຸມຊົນທ້ອງຖິ່ນ ແລະການສ້າງອະນາຄົດທີ່ຍືນຍົງໃນພາກພື້ນ. ຜູ້ເຂົ້າຮ່ວມໄດ້ຮຽນຮູ້ເຕັກນິກທີ່ປະຕິບັດໄດ້ຈິງເຊັ່ນ ການຟື້ນຟູທາງທຳມະຊາດ ແລະ ການຈັດການປ່າໄມ້ໃນພື້ນທີ່ ນ້ອຍ ແລະມີການສົນທະນາກ່ຽວກັບການມີສ່ວນຮ່ວມຂອງຊຸມຊົນ ແລະ ຮ່ວມມືກັບຜູ້ມີສ່ວນກ່ຽວຂ້ອງຕ່າງໆ. ການຝຶກອົບຮົມນຳໂດຍຜູ້ຊ່ຽວຊານຈາກສະຖາບັນຄົ້ນຄວ້າກະສິກຳແລະ ປ່າໄມ້ແຫ່ງຊາດ (NAFRI), ໃຫ້ບໍລິການຜະສົມຜສານຂອງການສະເຫນີ, ການຝຶກປະຕິບັດ, ການເຂົ້າຊົມສະຖານທີ່, ແລະ ການສົນທະນາກຸ່ມ. ວິທີການນີ້ບໍ່ພຽງແຕ່ພັດທະນາທັກສະ ແຕ່ຍັງສົ່ງເສີມການຮ່ວມມື, ປູທາງສໍາລັບການຈັດການປ່າໄມ້ທີ່ຍືນຍົງໃນລາວ. ການຝຶກອົບຮົມນີ້ຈະມີສ່ວນສົ່ງເສີມການພັດທະນາຄວາມຮ່ວມມືລະຫວ່າງລັດ, ບໍລິສັດ ແລະ ຊາວບ້ານໃນການອະນຸລັກຄວາມຫຼາກຫຼາຍທາງຊີວະນານົມແລະການເຊື່ອມຕໍ່ທາງຊີວະນິລິດທີ່ລະດັບພູມິທັດ.
ນອກຈາກນີ້, ຈະມີການຈັດກອງປະຊຸມສົນທະນາ ກ່ຽວກັບການຟື້ນຟູ ແລະ ການຮ່ວມມືໃນອະນາຄົດ ລະຫວ່າງຊຸມຊົນບ້ານ, ພາກລັດ, ອົງການຈັດຕັ້ງທາງສັງຄົມ (CSOs) ແລະ ພາກເອກະຊົນ. ການສົນທະນາເຫຼົ່ານີ້ ຈະຊ່ວຍກຳນົດຍຸດທະສາດຂອງປະເທດລາວ ໃນການຟື້ນຟູພູມິທັດ ໂດຍການແບ່ງປັນຜົນການຄົ້ນຄ້ວາ, ປຶກສາຫາລືກ່ຽວກັບນະໂຍບາຍລັດ, ແລະ ສະແຫວງຫາການຮ່ວມມືໃໝ່ໃໝ່ໆ.
ກ່ຽວກັບໂຄງການ:
ໂຄງການ ປົກປັກຮັກສາ ແລະ ນຳໃຊ້ລະບົບນິເວດປ່າໄມ້ ແລະ ຊີວະນາໆພັນ ແບບຍືນຍົງ (ProFEB) ເເມ່ນໂຄງການຮ່ວມມື ໂດຍລັດຖະບານ ສປປ ລາວ, ເຢຍລະມັນ ແລະ ສະຫະພາບເອີຣົບ, ນຳພາໂດຍ ກະຊວງ ກະສິກຳ ແລະ ປ່າໄມ້. ໂຄງການ ເຮັດວຽກຮ່ວມມືຢ່າງໃກ້ຊິດກັບ ກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເເລະ ກະຊວງ ຊັບພະຍາກອນທຳມະຊາດ ແລະ ສິ່ງແວດລ້ອມ, ແລະ ມະຫາວິທະຍາໄລແຫ່ງຊາດ. ໂຄງການເເມ່ນຈັດຕັ້ງປະຕິບັດ ຢູ່ ແຂວງ ຄຳມ່ວນ, ເເຂວງ ຫຼວງພະບາງ, ເເຂວງ ອຸດົມໄຊ, ເເຂວງ ຫົວພັນ, ເເຂວງ ໄຊຍະບູລີ, ແຂວງ ວຽງຈັນ ເເລະ ນະຄອນຫຼວງວຽງຈັນ. ໂຄງການ ເເມ່ນໄດ້ຮັບການສະໜັບສະໜູນທຶນໂດຍ ເຢຍລະມັນ ແລະ ສະຫະພາບເອີຣົບ.
ໃນປີ 2024, ໂຄງການປ້ອງກັນດິນຟ້າອາກາດ ໂດຍຫລີກລ້ຽງການທໍາລາຍປ່າໄມ້ (CliPAD) ຮ່ວມມືກັບ ໂຄງການ ການປົກປັກຮັກສາ ແລະ ນໍາໃຊ້ລະບົບນິເວດປ່າໄມ້ ແລະ ຊີວະນາໆພັນ ແບບຍືນຍົງ, ເຊິ່ງໄດ້ຮັບທຶນເພີ່ມຈາກ ສະຫະພາບ ເອີຣົບ ປະຈໍາ ສປປ ລາວ ເພື່ອຈັດຕັ້ງປະຕິບັດວຽກງານຂອງໂຄງການ ອົງປະກອບທີ 2 (ວຽກງານປ່າໄມ້) ໂດຍຜ່ານການຮ່ວມມືເປັນ “ທີມ ເອີຣົບ” ກັບ ລັດຖະບານແຫ່ງ ສປປ ລາວ ເພື່ອເພີ່ມການຄ້າ, ການລົງທຶນ ແລະ ການເຊື່ອມໂຍງໃນຂະແຫນງກະສິກໍາ ແລະ ປ່າໄມ້ແບບຍືນຍົງ ແລະ ມີສ່ວນຮ່ວມ (TICAF). ໂຄງການ ProFEB ໄດ້ສະຫນັບສະຫນູນການເພີ່ມການເຂົ້າຮ່ວມຂອງຊຸມຊົນພາຍໃນທ້ອງຖິ່ນ, ໂດຍສະເພາະແມ່ນ ແມ່ຍິງ, ເພື່ອເຮັດໃຫ້ຕ່ອງໂສ້ການເພີ່ມມູນຄ່າໃນການນໍາໃຊ້ ແລະ ການຮັກສາປ່າໄມ້ໃຫ້ຍືນຍົງ. ອົງປະກອບທີ 4 ແມ່ນການຟື້ນຟູພູມິທັດປ່າໄມ້ (FLR), ຈັດຕັ້ງປະຕິບັດໂດຍ ໂຄງການ CliPAD ໂດຍນໍາໃຊ້ສາຍສໍາພັນອັນຍາວນານກັບຊາວບ້ານຫລາຍກວ່າ 500 ບ້ານ ຢູ່ໃນ 6 ແຂວງ ພາກເຫນືອຂອງ ສປປ ລາວ ໃນການສະຫນັບສະຫນູນການຄຸ້ມຄອງປ່າໄມ້ແບບຍືນຍົງ ແລະ ຫລີກລ້ຽງການທໍາລາຍປ່າໄມ້. ຜົນທີ່ໄດ້ຮັບຈາກອົງປະກອບນີ້ ແມ່ນເພື່ອສົ່ງເສີມໃຫ້ການຮ່ວມມືລະຫວ່າງພາກເອກະຊົນ, ຊາວບ້ານ, ພາກລັດ ແລະ ອົງການຈັດຕັ້ງທາງສັງຄົມໃຫ້ເຂັ້ມແຂງຂຶ້ນ ໃນດ້ານການຟື້ນຟູພູມິທັດປ່າໄມ້ ແລະ ການປົກປັກຮັກສາຊີວະນາໆພັນ ທີ່ສາມາດທົນທານຕໍ່ການປ່ຽນແປງສະພາບດິນຟ້າອາກາດໄດ້.