ບ້ານກອງລໍກ້າວໄປສູ່ການພັດທະນາແບບຍືນຍົງ

ຊຸມຊົນບ້ານກອງລໍ, ຢູ່ແຂວງຄໍາມ່ວນ, ໄດ້ສ້າງຕັ້ງສະມາຄົມພັດທະນາການທ່ອງທ່ຽວແບບອານຸລັກຖ້ຳກອງລໍ-ນາຕານ (ສທກນ) ເພື່ອສົ່ງເສີມ ​ການ​ພັດ​ທະ​ນາ​ແບບ​ຍືນ​ຍົງ ​.

ສທກນ ໄດ້ສະຫນັບສະຫນູນ​ໂຄງການທຶນຂະໜາດ​ນ້ອຍໃຫ້ແກ່ປະຊາຊົນພາຍໃນຊຸມຊົນເພື່ອເພີ່ມໂອກາດໃນການສ້າງລາຍຮັບ, ເນື່ອງຈາກນັກທ່ອງທ່ຽວເພີ່ມຂຶ້ນ. ແມ່ຍິງພາຍໃນທ້ອງຖິ່ນຜະລິດເຄື່ອງຫັດຖະກຳຈາກຝ້າຍ ແລະ ໄໝ ເພື່ອຂາຍໃຫ້ແກ່ນັກທ່ອງທ່ຽວ, ເຊິ່ງເປັນແຫລ່ງລາຍຮັບຫລັກຂອງຄອບຄົວ.

ນອກຈາກນີ້, ສະມາຄົມດັ່ງກ່າວຍັງສົ່ງເສີມການປູກຝັງ ແລະ ລ້ຽງສັດໃນຄົວເຮືອນ. ຫຼາຍກວ່າ 15 ຄອບຄົວ​ໃນບ້ານກອງລໍ ສາມາດ​ສ້າງ​ລາຍ​ຮັບເພີ່ມຜ່ານໂຄງການສົ່ງເສີມການລ້ຽງສັດ ​ແລະ ປູກ​ຜັກ. ຄອບຄົວເຫຼົ່ານີ້ໄດ້ຮັບລູກເປັດ, ໄກ່, ກົບ, ປາ, ແລະ ພັນພືດ, ພ້ອມກັບການຝຶກອົບຮົບການລ້ຽງສັດ ແລະ ການປູກຝັງແບບຍືນຍົງ.

ນາງ ມືດ ເພັດວິໄຊ, ປະຊາຊົນບ້ານກອງລໍ, ກ່າວວ່າ: ພາຍຫຼັງໄດ້ຮັບແນວພັນພືດຜັກ ແລະ ການຝຶກອົບຮົມກະສິກຳອິນຊີຈາກ ສທກນ ແລ້ວ, ຄອບຄົວຂອງພວກເຮົາໄດ້ຮັບຜົນຜະລິດຈາກການປູກຝັງຫລາຍຂຶ້ນ. ວຽກງານນີ້ສ້າງລາຍຮັບເສີມ ແລະ ໂອກາດໃຫ້ຂ້າພະເຈົ້າໄດ້ສະຫນອງຜົນຜະລິດຈາກການປູກຝັງ ແລະ ລ້ຽງສັດ ໃຫ້ແກ່ບັນດາຮ້ານອາຫານ ແລະ ໂຮງແຮມພາຍໃນທ້ອງຖິ່ນ, ເຊິ່ງຍັງຕ້ອງການວັດຖຸດິບເພື່ອປຸງແຕ່ງອາຫານເພື່ອຮັບແຂກ ແລະ ນັກທ່ອງທ່ຽວ. ຂ້າ​ພະ​ເຈົ້າ​ຢາກຂໍໃຫ້​ໂຄງ​ການ​ນີ້ສືບ​ຕໍ່ໄປ​, ເພາະ​ວ່າ​ມັນ​ສ້າງຜົນ​ປະ​ໂຫຍດ ​ແລະ ​ປັບ​ປຸງ​ຊີ​ວິດ​ການເປັນຢູ່ໃຫ້ແກ່ຫຼາຍຄອບຄົວໃຫ້ດີຂຶ້ນ​"​.

ຈຸດເດັ່ນອີກອັນໜຶ່ງໃນບ້ານກອງລໍແມ່ນ ສະມາຄົມດັ່ງກ່າວຍັງສະຫນັບສະຫນູນໂຄງການລິເລີ່ມຂອງຊຸມຊົນໃນການຈັດການຂີ້ເຫຍື້ອ ແລະ ສິ່ງເສດເຫຼືອຕ່າງໆພາຍໃນຊຸມຊົນ ແລະ ສະຖານທີ່ທ່ອງທ່ຽວ, ໂດຍການສະໜອງຖັງຂີ້ເຫຍື້ອ 45 ຖັງໃນໝູ່ບ້ານ. ຜູ້ເກັບຂີ້ເຫຍື່ອຈະຄັດແຍກປະເພດຂອງຂີ້ເຫຍື້ອທຸກອາທິດ, ປະຊາຊົນພາຍໃນຊຸມຊົນຮັບຜິດຊອບແຍກຂີ້ເຫຍື້ອຕາມປະເພດຕ່າງໆ, ເຊັ່ນ: ຂີ້ເຫຍື້ອທີ່ນຳມາໃຊ້ຄືນໄດ້ ເຊັ່ນ: ຂວດນ້ຳ ແລະ ກະປ໋ອງຕ່າງໆ, ເພື່ອຂາຍໃຫ້ແກ່ບໍລິສັດທີ່ນໍາຂີ້ເຫຍື່ອເຫລົ່ານີ້ມາຜະລິດ ແລະ ນໍາໃຊ້ຄືນ.

ໂຄງການລິ່ເລີ່ມເຫລົ່ານີ້ແມ່ນໄດ້ຮັບການສະໜັບສະນູນໂດຍ ແຜນງານ CEGGA II, ເຊິ່ງສຸມໃສ່ການສ້າງຂີດຄວາມສາມາດຂອງສະມາຄົມພາຍໃນຊຸມຊົນ ແລະ ອົງການຈັດຕັ້ງທ້ອງຖິ່ນໃນຫຼາຍຂົງເຂດໃນ ສປປ ລາວ. ແຜນງານແມ່ນ​ໄດ້​ຮັບ​ທຶນ​ສະໜັບສະໜູນຈາກ​ປະເທດສະ​ວິດ​ເຊີ​ແລນ, ເຢຍ​ລະ​ມັນ, ແລະ​ ສະ​ຫະ​ພາບ​ເອີ​ຣົບ, ເຊິ່ງ ຈັດຕັ້ງ​ປະ​ຕິ​ບັດ​ແຜນງານໂດຍ ຫ້ອງການ GIZ.