ວຽກງານອາຊີວະສຶກສາ ແບບຄວບຄູ່ (ອສຄ): ເຢຍລະມັນ ຮ່ວມມືກັບ ສປປ ລາວ ເປີດໂຕໂຄງການໄລຍະໃຫມ່ ໃນ ສປປ ລາວ

ນະຄອນຫຼວງວຽງຈັນ, ສປປ ລາວ – 8 ພະຈິກ 2024 – ເພື່ອສົ່ງເສີມຂະແໜງອະຊີວະສຶກສາໃນ ສປປ ລາວ, ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ (ສປປ ລາວ) ພ້ອມກັບ ລັດຖະບານ ແຫ່ງ ສະຫະພັນ ສາທາລະນະລັດ ເຢຍລະມັນ ໄດ້ຂະຫຍາຍການຈັດຕັ້ງປະຕິບັດໂຄງການ ພ້ອມທັງ ເປີດຕົວໂຄງການອາຊີວະສຶກສາ ໃນ ສປປ ລາວ (VELA) ໄລຍະ 3 ຢ່າງເປັນທາງການ. ໂດຍອີງໃສ່ແຜນບູລິມະສິດຂອງກະຊວງສຶກສາທິການ ແລະ ກິລາ (MoES), ໃນການຈັດຕັ້ງປະຕິບັດໂຄງການໃນໄລຍະ 3 ນີ້, ໂຄງການ VELA ຈະຂະຫຍາຍການສຶກສາແບບຄວບຄູ່ ອອກໄປທົ່ວປະເທດ, ໂດຍການສະໜັບສະໜູນສະຖາບັນອາຊີວະສຶກສາ ຢ່າງໜ້ອຍ 10 ແຫ່ງ, ພ້ອມທັງສົ່ງເສີມການຮ່ວມມືລະຫວ່າງພາກລັດ ສະຖານປະກອບການ, ຫົວຫນ່ວຍທຸລະກິດ ແລະ ອົງການຈັດຕັ້ງພາກເອກະຊົນ ເພື່ອຍົກລະດັບອາຊີວະສຶກສາໃຫ້ສອດຄ່ອງກັບຄວາມຕ້ອງການຂອງຕະຫຼາດແຮງງານ.

ກົດໝາຍ ວ່າດ້ວຍອາຊີວະສຶກສາ ສະບັບປັບປຸງ ໃນປີ 2019 ໄດ້ຮັບຮອງເອົາອາຊີວະສຶກສາແບບຄວບຄູ່ (ອສຄ) ເຂົ້າໃນ ເຂົ້າໃນລະບົບການສຶກສາ. ການຈັດຕັ້ງປະຕິບັດໂດຍອີງໃສ່ຕະຫລາດແຮງງານເປັນຫລັກຈະສ້າງຄວາມເຂັ້ມແຂງໃຫ້ແກ່ການພັດທະນາເສດຖະກິດແບບຍືນຍົງ. 

ທ່ານ ປອ ສໍາລານ ພັນຄະວົງ, ຮອງລັດຖະມົນຕີ, ກະຊວງສຶກສາທິການ ແລະ ກິລາ, ໄດ້ສະຫຼຸບ ຄວາມສໍາຄັນຂອງການຈັດຕັ້ງປະຕິບັດໂຄງການດັ່ງກ່າວວ່າ: “ອສຄ ແມ່ນການປະສົມປະສານ ການຮຽນພາກທິດສະດີ ແລະ ຝຶກປະຕິບັດຂັ້ນພື້ນຖານ ຢູ່ໃນສະຖານອາຊີວະສຶກສາ ກັບ ການປະຕິບັດຕົວຈິງຢູ່ສະຖານປະກອບການ ເຊິ່ງເຮັດໃຫ້ນັກສຶກສາ ສາມາດພັດທະນາທັກສະທີ່ສໍາຄັນ ພ້ອມທັງ ເພີ່ມຄວາມໝັ້ນໃຈ ຕັ້ງແຕ່ພວກເຂົາໄດ້ຕັດສິນໃຈເລີ່ມເຂົ້າມາສຶກສາໃນຂະແໜງດັ່ງກ່າວ”.

ທ່ານ ນາງ ນິໂຄ ສະເຕັກແມນ, ອຸປະທູດ ປະຈໍາສະຖານທູດເຢຍລະມັນ ປະຈໍາ ສປປ ລາວ, ໄດ້ໃຫ້ຄໍາເຫັນເພີ່ມຕື່ມວ່າ: “ວິທະຍາໄລອາຊີວະສຶກສາ ທັງສີ່ແຫ່ງ ຢູ່ ແຂວງຈໍາປາສັກ, ຫຼວງພະບາງ, ແຂວງວຽງຈັນ ແລະ ນະຄອນຫຼວງວຽງຈັນ ໄດ້ຈັດຕັ້ງປະຕິບັດການຮຽນ-ການສອນ ອສຄ, ໂດຍສະເພາະແມ່ນໃນສາຂາ ກະສິກຳ, ໄຟຟ້າ, ລົດຍົນ ແລະ ການບໍລິການ, ເຊິ່ງໄດ້ຮ່ວມມືກັບສະຖານປະກອບການທ້ອງຖິ່ນ ຫຼາຍກວ່າ 150 ແຫ່ງ ທີ່ໄດ້ເຊັນສັນຍາເຂົ້າຮ່ວມການຈັດຕັ້ງປະຕິບັດ ອສຄ, ເຮັດໃຫ້ນັກສຶກສາໄດ້ຮັບປະສົບການເຮັດວຽກຕົວຈິງ.”

ໂຄງການ VELA III ນີ້ ຍັງຈະສຸມໃສ່ສະໜັບສະໜູນວຽກງານ ອາຊີວະສຶກສາສີຂຽວ ຫຼື Green TVET, ໂດຍໃຫ້ຄວາມສຳຄັນກັບການຝຶກອົບຮົມຄູ ອາຈານ ໃນດ້ານການນຳໃຊ້ພະລັງງານ ແລະ ຊັບພະຍາກອນຢ່າງມີປະສິດທິພາບ ລວມທັງການປະຕິບັດກິດຈະກຳທີ່ເປັນມິດຕໍ່ສິ່ງແວດລ້ອມ. ໃນປີ 2024, ຊຸດຝຶກອົບຮົມໃໝ່ ໃນຫົວຂໍ້ການຈັດການໂຮງແຮມ ແລະ ການບໍລິການແບບຍືນຍົງໄດ້ຖືກພັດທະນາຂຶ້ນ ແລະ ພ້ອມໃຫ້ນຳໃຊ້ໃນຮູບແບບອອນລາຍ ຜ່ານຊ່ອງທາງການຮຽນຮູ້ ອາຕິງກີ (Atingi) ທີ່ປັດຈຸບັນນຳໃຊ້ໂດຍ ສະຖາບັນພັດທະນາອາຊີວະສຶກສາ (VEDI). ນອກຈາກນີ້, ໂຄງການ VELA III ຍັງໃຫ້ບູລິມະສິດແກ່ອາຊີວະສຶກສາສໍາລັບນັກຮຽນຍິງ, ໂດຍເລັ່ງໃສ່ການນໍາສະເໜີສະແໜງອາຊີວະສຶກສາທີ່ພວກເຂົາອາດຈະສົນໃຈ, ໂດຍສະເພາະແມ່ນກ່ຽວກັບວຽກງານການຄ້າ.

ເຄື່ອງມືການທົດສອບຄວາມຖະຫນັດດ້ານອາຊີບ (OASA) ໄດ້ເປີດໂຕ ແລະ ຖືກນໍາໃຊ້ໂດຍ ສູນບໍລິການ ອາຊີວະສຶກສາແບບຄວບຄູ່ ຂອງ ສະພາການຄ້າ ແລະ ອຸດສາຫະກໍາແຫ່ງຊາດ, ເຊິ່ງເປັນສ່ວນຫນຶ່ງຂອງໂຄງການ. ເຄື່ອງມືດັ່ງກ່າວຈະຊ່ວຍໃຫ້ຊາວຫນຸ່ມລາວໄດ້ຄົ້ນຄວ້າກ່ຽວກັບສາຂາອາຊີບ ແລະ ເສັ້ນທາງອາຊີບທີ່ພວກເຂົາສົນໃຈ ແລະ ແທດເຫມາະສໍາລັບພວກເຂົາ.

ໄລຍະທີ 3 ຂອງ VELA ໄດ້ເລີ່ມຕົ້ນໃນ ເດືອນສິງຫາ 2024 ແລະ ຈະປະຕິບັດຈົນຮອດ ເດືອນກໍລະກົດ 2027. ສະຫະພັນ ສາທາລະນະລັດ ເຢຍລະມັນ, ໂດຍຜ່ານກະຊວງການຮ່ວມມືດ້ານເສດຖະກິດ ແລະ ການພັດທະນາ (BMZ), ປະກອບສ່ວນ 5 ລ້ານເອີໂຣ ໃຫ້ແກ່ການປະຕິບັດໂຄງການຮ່ວມມືດັ່ງກ່າວ.

ກ່ຽວກັບ ໂຄງການ VELA III

ໂຄງການ VELA III ຈັດຕັ້ງປະຕິບັດຢ່າງໃກ້ຊິດກັບ ກະຊວງສຶກສາທິການ ແລະ ກິລາ, ສະພາການຄ້າ ແລະ ອຸດສາຫະກໍາ ແຫ່ງຊາດລາວ ພ້ອມກັບ ບັນດາສະຖານປະກອບການ ທີ່ໃຫ້ການສະໜັບສະໜູນການຈັດຕັ້ງປະຕິບັດ ອາຊີວະສຶກສາແບບຄວບຄູ່ (ອສຄ) ເພື່ອຍົກລະດັບອາຊີວະສຶກສາໃຫ້ສອດຄ່ອງກັບຄວາມຕ້ອງການຂອງຕະຫຼາດແຮງງານ.

ກ່ຽວກັບ ຫ້ອງການ GIZ ປະຈໍາ ສປປ ລາວ

The Deutsche Gesellschaft für Internationale Zusammenarbeit (GIZ) GmbH, ໄດ້ເຄື່ອນໄຫວວຽກງານຢູ່ ສປປ ລາວ ແຕ່ປີ 1993, ຕາງໜ້າໃຫ້ກະຊວງການຮ່ວມມື ດ້ານເສດຖະກິດ ແລະ ການພັດທະນາ (BMZ) ພ້ອມກັບກະຊວງອື່ນໆທີ່ກ່ຽວ ແຫ່ງ ສະຫະພັນ ສາທາລະນະລັດ ເຢຍລະມັນ ແລະ ບັນດາຄູ່ຮ່ວມພັດທະນາສາກົນ. ໃນປັດຈຸບັນ, ຫ້ອງການ GIZ ກໍາລັງຈັດຕັ້ງປະຕິບັດຫລາຍໂຄງການໃນ 4 ຂົງເຂດບູລິມະສິດຄື: ກ) ການພັດທະນາຊົນນະບົດ, ຂ) ການອະນຸລັກຮັກສາທໍາມະຊາດ, ຄ) ການພັດທະນາເສດຖະກິດແບບຍືນຍົງ ແລະ ງ) ວຽກງານການປົກຄອງທີ່ດີ.