ສ້າງຄວາມເຂັ້ມແຂງດ້ານຄວາມຍຸຕິທຳ: ໂຄງການ CLE ພັດທະນາທັກສະຂອງນັກສຶກສາກົດໝາຍລາວ
ໂຄງການສ້າງຄວາມເຂັ້ມແຂງ ແລະ ພັດທະນາການສຶກສາກົດໝາຍຮູບແບບຄລີນິກ (CLE) ໄດ້ເສີມຂະຫຍາຍທັກສະຂອງນັກສຶກສາກົດໝາຍລາວໂດຍຜ່ານການຝຶກອົບຮົມຈາກປະສົບການຕົວຈິງຄຽງຄູ່ກັບພາກທິດສະດີທີ່ໄດ້ຮຽນຮູ້ໃນຫ້ອງຮຽນ, ເພື່ອພັດທະນາຄວາມສາມາດ ແລະ ຊຸກຍູ້ການເຂົ້າເຖິງຄວາມຍຸຕິທຳ ແລະ ລັດທີ່ປົກຄອງດ້ວຍກົດຫມາຍໃນລາວ.
ໜຶ່ງໃນຜູ້ເຂົ້າຮ່ວມໂຄງການແມ່ນ ທ້າວ ສົມລີ ຫຼວງແສງພິວ, ນັກສຶກສາກົດໝາຍຈາກສະຖາບັນຍຸຕິທຳແຫ່ງຊາດ, ສາຂາແຂວງຫຼວງພະບາງ. ໃນໄລຍະສອງປີໃນເຂົ້າຮ່ວມໂຄງການ CLE, ສົມລີ ໄດ້ຮຽນຮູ້ຫຼາຍຢ່າງຜ່ານການຮຽນຮູ້ໃນຫ້ອງຮຽນ ແລະ ການໂຄສະນາເຜີຍແຜ່ກົດຫມາຍພາຍໃນຊຸມຊົນ ກ່ຽວກັບບັນຫາຕ່າງໆໃນ ສປປ ລາວ, ໂດຍສະເພາະແມ່ນຄວາມຮຸນແຮງໃນຄອບຄົວ. ສົມລີໄດ້ເນັ້ນຫນັກເຖິງຄວາມຈຳເປັນອັນຮີບດ່ວນຕໍ່ການຊ່ວຍເຫຼືອທາງດ້ານກົດຫມາຍໃນເຂດຊຸມຊົນທີ່ທຸກຍາກວ່າ, "ປະຊາຊົນຜູ້ທຸກຍາກຈໍານວນຫຼາຍບໍ່ຮູ້ວ່າຈະໄປຊອກຫາຄວາມຊ່ວຍເຫຼືອທາງດ້ານກົດໝາຍຈາກບ່ອນໃດ, ແລະມີຫຼາຍຢ່າງທີ່ຈະຕ້ອງໄດ້ຮັບການແກ້ໄຂ, ໂດຍສະເພາະແມ່ນຢູ່ໃນເຂດຫ່າງໄກສອກຫຼີກໃນຫຼວງພະບາງ." .
ເສັ້ນທາງຊີວິດຂອງສົມລີເປັນແຮງບັນດານໃຈໃຫ້ກັບນັກຮຽນຫຼາຍໆຄົນ. ລາວມາຈາກພື້ນຖານຄອບຄົວທີ່ລຳບາກ ແລະ ຕ້ອງເຮັດວຽກເສີມເພື່ອຈ່າຍຄ່າຮຽນ. ເຖິງວ່າຈະມີສິ່ງທ້າທາຍທາງດ້ານການເງິນ, ລາວມີຄວາມຝັນທີ່ຈະເປັນທະນາຍຄວາມເພື່ອຊ່ວຍເຫຼືອປະຊາຊົນພາຍໃນຊຸມຊົນ, ສົ່ງເສີມສິດທິເທົ່າທຽມກັນ, ແລະ ຍຶດໝັ້ນຫຼັກການການສ້າງລັດທີ່ປົກຄອງດ້ວຍກົດໝາຍ. ໂຄງການ CLE ໄດ້ໃຫ້ໂອກາດແກ່ສົມລີໃນການເຮັດວຽກພາກປະຕິບັດ ເພື່ອເຮັດໃຫ້ເພິ່ນມີຄວາມເຂົ້າໃຈກ່ຽວກັບສິ່ງທ້າທາຍທາງດ້ານກົດໝາຍໃນ ສປປ ລາວຫຼາຍຍິ່ງຂື້ນ.
ນອກຈາກສົມລີແລ້ວ, ນັກສຶກສາກົດໝາຍຫຼາຍຄົນໃນແຂວງຫຼວງພະບາງໄດ້ຮັບຜົນປະໂຫຍດຈາກການຈັດຕັ້ງປະຕິບັດໂຄງການນີ້. ໜື່ງໃນນັ້ນແມ່ນນັກນັກສຶກສາຈົບໃໝ່, ເຊັ່ນ ນາງ ກຸ້ງນາ ເພັດດາລາ. ລາວໄດ້ກ່າວວ່າ ໂຄງການ CLE ເປັນໂຄງການທີ່ມີປະໂຫຍດຕໍ່ຕໍ່ຊຸມຊົນທີ່ປະເຊີນກັບຄວາມບໍ່ສະເໝີພາບ ແລະ ບັນຫາກ່ຽວກັບບົດບາດຍິງ-ຊາຍ. ໃນຂະນະທີ່ເຮັດວຽກຢູ່ໃນເມືອງຈອມເພັດ ແຂວງຫຼວງພະບາງນັ້ນ, ກຸ້ງນາໄດ້ຊ່ວຍຜູ້ເຄາະຮ້າຍຈາກຄວາມຮຸນແຮງພາຍໃນຄອບຄົວ, ໂດຍຕິດຕໍ່ກັບຫ້ອງການຊ່ວຍເຫຼືອທາງດ້ານກົດຫມາຍເພື່ອຂໍຄວາມຊ່ວຍເຫຼືອ. ກຸ້ງນາກ່າວວ່າ, "ຂ້ອຍດີໃຈທີ່ໄດ້ໃຫ້ຄໍາແນະນໍາທາງດ້ານກົດຫມາຍ ທີ່ຊ່ວຍໃຫ້ປະຊາຊົນດໍາລົງຊີວິດສາມັກຄີປອງດອງກັນ.”
ໂຄງການນີ້ບໍ່ພຽງແຕ່ໃຫ້ນັກສຶກສາຮຽນຮູ້ຈາກວຽກງານປະຕິບັດຕົວຈິງເທົ່ານັ້ນ, ແຕ່ຍັງຊ່ວຍໃຫ້ພວກເຂົາພັດທະນາທັກສະສ່ວນຕົວ. ນາງ ສຸດາລັດ ພັນທະສຸກ, ນັກສຶກສາກົດໝາຍປີທີ 3 ຢູ່ສະຖາບັນຍຸຕິທຳແຫ່ງຊາດ ແຂວງຫຼວງພະບາງ, ໄດ້ກ່າວວ່າໂຄງການນີ້ໄດ້ເພີ່ມຄວາມຫມັ້ນໃຈຂອງລາວ. ສຸດາລັດກ່າວວ່າ, "ກ່ອນທີ່ຈະເຂົ້າຮ່ວມໂຄງການ CLE, ຂ້ອຍບໍ່ເຄີຍໄດ້ໃຊ້ໄມໂຄຣໂຟນເລີຍ," ແຕ່ໃນປັດຈຸບັນ ລາວກ້າທີ່ຈະເປັນກະບອກສຽງໃນການຕໍ່ຕ້ານກັບຄວາມບໍ່ຍຸຕິທໍາ ແລະ ການລ່ວງລະເມີດເດັກ. ລາວຢາກເປັນທະນາຍຄວາມເພື່ອຊ່ວຍເຫຼືອແມ່ຍິງ ແລະເດັກນ້ອຍທີ່ມີຄວາມສ່ຽງ.
ໂຄງການ CLE, ຈັດຕັ້ງປະຕິບັດໂດຍແຜນງານ CEGGA ໂດຍຮ່ວມມືກັບ BABSEACLE ເພື່ອສຸມໃສ່ການພັດທະນາຈັນຍາບັນດ້ານວິຊາຊີບ ແລະ ທັກສະການປະຕິບັດຕົວຈິງຂອງນັກສຶກສາ, ເພື່ອເສີມສ້າງຄວາມຍຸຕິທໍາໃນຊຸມຊົນດ້ອຍໂອກາດໃນ ສປປ ລາວ. ໂຄງການນີ້ໄດ້ຮັບການສະໜັບສະໜູນໂດຍລັດຖະບານປະເທດສະວິດເຊີແລນ, ປະເທດເຢຍລະມັນ ແລະ ສະຫະພາບເອີຣົບ, ໂດຍຜ່ານຫ້ອງການGIZ.