ສ້າງຂີດຄວາມສາມາດກ່ຽວກັບທັກສະການສື່ສານ, ການປຶກສາຫາລື ແລະ ການເປັນຜູ້ນຳໃຫ້ແກ່ພະນັກງານລັດຖະກອນ ແລະ ອົງການຈັດຕັ້ງສັງຄົມລາວ

ພະນັກງານຍິງຈາກກະຊວງພາຍໃນ, ກະຊວງກະສິກຳ ແລະ ປ່າໄມ້, ພະແນກພາຍໃນແຂວງ ແລະ ຫ້ອງການພາຍໃນເມືອງ ໃນແຂວງຄຳມ່ວນ ແລະ ແຂວງຫຼວພະບາງ ພ້ອມດ້ວຍອົງການຈັດຕັ້ງສັງຄົມລາວ 7 ອົງການຈາກຫຼາຍແຂວງໃນປະເທດລາວ ເຂົ້າຮ່ວມການສ້າງຂີດຄວາມສາມາດທັກສະ ເປັນເວລາ 2 ວັນ ທີ່ນະຄອນຫຼວງວຽງຈັນ ນໍາໂດຍຫ້ອງການກະຊວງພາຍໃນ ແລະ ສະໜັບສະໜູນໂດຍແຜນງານ CEGGA.

ພະນັກງານຍິງຍັງຄົງບໍ່ກ້າສະແດງອອກໃນການສື່ສານຕໍ່ສາທາລະນະ, ໂດດເດັ່ນໜ້ອຍກວ່າ ແລະ ອອກສຽງໜ້ອຍກວ່າໃນການມີສ່ວນຮ່ວມການປຶກສາຫາລືທາງດ້ານນະໂຍບາຍເມື່ອທຽບກັບເພື່ອນຮ່ວມງານຊາຍຂອງເຂົາເຈົ້າ. ສິ່ງທີ່ເຫັນໄດ້ຊັດເຈນໂດຍສະ ເພາະຕຳແໜ່ງທີ່ສູງຂື້ນຍັງເປັນອຸປະສັກສຳລັບຜູ້ຍິງອາຍຸໜຸ່ມນ້ອຍທີ່ມີຄວາມສາມາດເຂົ້າມາຮັບໜ້າທີ່ໃນຕຳແໜ່ງນຳພາ. ທ່ານ ຕິ່ງທອງ ເພັດສະວົງ, ທີ່ປຶກສາບົດບາດຍິງ-ຊາຍ ຜູ້ທີ່ມີປະສົບການ ໄດ້ນຳໃຊ້ເຄຶ່ອງມື ແລະ ວິທິການປະສົມປະສານເພື່ອອຳນວຍຄວາມສະດວກໃນການຝຶກອົບຮົມ. ຜູ້ເຂົ້າຮ່ວມຈະຕ້ອງພັດທະນາທັກສະການເປັນຜູ້ນຳ ແລະ ມີເຄື່ອງມື ແລະ ຍຸດທະສາດ ເພື່ອເສີມຂະຫຍາຍອິດທິພົນໃນການພັດທະນາການເປັນຜູ້ນຳຍິງ ແລະ ກຳນົດວຽກງານເສື່ອມສານບົດບາດຍິງ-ຊາຍເຂົ້າໃນຄວາມຮັບຜິດຊອບຂອງຕົນ.

ທ່ານ ນາງ ເຄືອວັນ ຈັນທະພູວົງ, ຮອງຫົວໜ້າກົມພັດທະນາບໍລິຫານລັດ ກະຊວງພາຍໃນ ໄດ້ໃຫ້ທັດສະນະວ່າ ‘ການປ່ຽນແປງຄວາມສະເໝີພາບຍິງ-ຊາຍ ໃນສັງຄົມ ແມ່ນມີຄວາມເປັນໄປໄດ້ ກ່ອນອື່ນຕ້ອງເລີ່ມຈາກການປ່ຽນແປງທີ່ຕົວເຮົາເອງກ່ອນ, ສ້າງຕົນເອງໃຫ້ມີກໍາລັງ ແລະ ປະສິດທິພາບພຽງພໍ ເພື່ອຍູ້ໜູນໃນການປ່ຽນແປງ, ສ້າງຕົນເອງເຮັດໃຫ້ເປັນທີ່ຍອມຮັບຂອງການຈັດຕັ້ງ ແລະ ໝູ່ຄະນະ. ໃນການເປັນຜູ້ຍູ້ໜູນການປ່ຽນແປງ ເຮົາຕ້ອງຮູ້ຈັກຕົນເອງ ແລະ ເຂົ້າໃຈຄວາມຕ້ອງການຂອງຕົນເອງກ່ອນ, ມີເປົ້າໝາຍ ແລະ ຈຸດຢືນທີ່ຈະແຈ້ງ,  ພ້ອມທັງກ້າທີ່ຈະປົກປ້ອງສີ່ງທີ່ຖືກຕ້ອງ, ກ້າທ້າທາຍຕົນເອງໃນການຮຽນຮູ້ສີ່ງໃໝ່ ແລະ ເປີດຮັບຟັງຄໍາເຫັນທີ່ແຕກຕ່າງ ແລະ ປ່ຽນແປງໃນທາງທີ່ສ້າງສັນ’.

ແຜນງານ CEGGA ເປັນຈຸດລິເລີ່ມຮ່ວມກັນລະຫວ່າງ ລັດຖະບານຂອງ ສປປ ລາວ ແລະ ຄູ່ຮ່ວມພັດທະນາ “ທີມເອີຣົບ”  ເຊີ່ງລວມມີ: ລັດຖະບານສະວິສເຊີແລນ, ລັດຖະບານເຢຍລະມັນ, ສະຫະພາບ ເອີຣົບ. ແຜນງານ CEGGA ເປັນແຜນງານທຳອິດທີ່ເປັນການຈັດຕັ້ງປະຕິບັດຮ່ວມກັນໃນການຮ່ວມມືຂອງທີມເອີຣົບ ເຮັດວຽກຮ່ວມມືກັບລັດຖະບານລາວ ເພື່ອເຮັດວຽກຮ່ວມກັນໃຫ້ດີຂື້ນ. GIZ ໄດ້ຮັບມອບໝາຍໃຫ້ຈັດຕັ້ງປະຕິບັດແຜນງານຮ່ວມກັບຄູ່ຮ່ວມງານພາກລັດ ເພື່ອໃຫ້ບັນລຸເປົ້າໝາຍລວມໃນການເພີ່ມທະວີການມີສ່ວນຮ່ວມຂອງປະຊາຊົນໃນຂະບວນການພັດທະນາປະເທດຊາດ ໂດຍສົ່ງເສີມວຽກງານການປົກຄອງທີ່ດີ, ສິດທິມະນຸດ ແລະ ການສ້າງລັດທີ່ປົກຄອງດ້ວຍກົດໝາຍ.