ສະພາບໍລິຫານຂອງແຜນງານ CEGGA ໄລຍະທີ II ໄດ້ຮັບຮອງເອົາຜົນສຳເລັດການຈັດຕັ້ງປະຕິບັດແຜນງານ

ໃນວັນທີ 25 ມິຖຸນາ 2024, ສະພາບໍລິຫານແຜນງານຮ່ວມມືຂອງທີມເອີຣົບ ກັບ ສປປ ລາວ “ການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ” (ແຜນງານ CEGGA II) ໄດ້ຈັດກອງປະຊຸມທົບທວນການຈັດຕັ້ງປະຕິບັດ ຄັ້ງທີ່ສອງ ເພື່ອຮັບຮອງເອົາຜົນສຳເລັດໃນປີທີ່ຜ່ານມາ ແລະ ແຜນບຸລິມະສິດສຳລັບປີ 2024/2025. 

ໃນຕອນເຊົ້າ ສະພາທີ່ປຶກສາໄດ້ເຊີນບັນດາຄູ່ຮ່ວາມງານຈາກອົງການຈັດຕັ້ງລັດເພື່ອທົບທວນຜົນສຳເລັດ ແລະ ສົນທະນາແລກປ່ຽນກ່ຽວກັບຍຸດທະສາດ ແລະ ການເຮັດງານຮ່ວມກັນເພື່ອເພີ່ມທະວີການຮ່ວມມື. ໃນຕອນບ່າຍ, ສະມາຊິກສະພາທີ່ປຶກສາໄດ້ຮັບຮອງເອົາການຈັດຕັ້ງປະຕິບັດ ແລະ ຜົນສຳເລັດ ລວມທັງຜົນການປະເມີນກາງໄລຍະຂອງແຜນງານ CEGGA II ແລະ ສະເໜີແຜນຈັດຕັ້ງປະຕິບັດ ແລະ ຄາດໝາຍສຳລັບປີ2024/2025.

ກອງປະຊຸມດັ່ງກ່າວໄດ້ຮັບກຽດເປັນປະທານໂດຍ ທ່ານ ນິສິດ ແກ້ວປັນຍາ ຮອງລັດຖະມົນຕີກະຊວງພາຍໃນ ແລະ ທ່ານ ນາງ Ina Marciulionyte, ເອກອັກຄະລັດຖະທູດສະຫະເອີຣົບປະຈຳ ສປປ ລາວ ເຊິ່ງຕ່າງຫນ້າໃຫ້ທີມເອີຣົບ. ກອງປະຊຸມດັ່ງກ່າວມີບັນດາຜູ້ເຂົ້າຮ່ວມຈາກຕ່າງໜ້າຄູ່ຮ່ວມຈັດຕັ້ງປະຕິບັດ, ກະຊວງພາຍໃນ ແລະ ທີມເອີຣົບເຊີ່ງລວມມີ: ລັດຖະບານສະວິສເຊີແລນ, ລັດຖະບານເຢຍລະມັນ, ສະຫະພາບ ເອີຣົບ ແລະ GIZ ພ້ອມທັງຄູ່ຮ່ວມຈັດຕັ້ງປະຕິບັດຫຼັກຈາກຂັ້ນສູນກາງ ແລະ ຂັ້ນແຂວງ.

ທີມເອີຣົບໄດ້ສະແດງຄວາມຍິນດີຕໍ່ຜົນສຳເລັດທີ່ສຳຄັນ ແລະ ຜົນການປະເມີນກາງໄລຍະຂອງແຜນງານ CEGGA II ເຊິ່ງຍົກໃຫ້ເຫັນເຖິງຄວາມສອດຄ່ອງຂອງແຜນງານ, ການຮ່ວມມືທີ່ດີ ແລະ ການປະກອບສ່ວນທີ່ສຳຄັນຕໍ່ປັບປຸງການພົວພັນລະຫວ່າງພາກລັດ ແລະ ປະຊາຊົນ. 

ແຜນງານ CEGGA ເປັນຈຸດລິເລີ່ມຮ່ວມກັນລະຫວ່າງ ລັດຖະບານຂອງ ສປປ ລາວ ແລະ ຄູ່ຮ່ວມພັດທະນາ “ທີມເອີຣົບ” ເຊີ່ງລວມມີ: ລັດຖະບານສະວິສເຊີແລນ, ລັດຖະບານເຢຍລະມັນ, ສະຫະພາບ ເອີຣົບ. ເຊິ່ງເປັນແຜນງານການຮ່ວມມືຂອງທີມເອີຣົບຄັ້ງທຳອິດທີ່ໄດ້ຮ່ວມມືກັນລັດຖະບານລາວ ເພື່ອເຮັດວຽກຮ່ວມກັນໃຫ້ດີຂື້ນ. ແລະ ຈິໄອແຊັດ (GIZ) ໄດ້ຮັບມອບໝາຍໃຫ້ຈັດຕັ້ງປະຕິບັດແຜນງານຮ່ວມກັບກະຊວງພາຍໃນ ແລະ ຄູ່ຮ່ວມຈັດຕັ້ງປະຕິບັດທີ່ກ່ຽວຂ້ອງເພື່ອໃຫ້ບັນລຸເປົ້າໝາຍລວມໃນການເພີ່ມທະວີການມີສ່ວນຮ່ວມຂອງປະຊາຊົນໃນຂະບວນການພັດທະນາປະເທດຊາດ ໂດຍສົ່ງເສີມການປົກຄອງທີ່ດີ,  ການສ້າງລັດທີ່ປົກຄອງດ້ວຍກົດໝາຍ ແລະ ການເຂົ້າເຖິງກົດໝາຍ.