ຮ່ວມສະເຫລີມສະຫລອງ ນະວັດຕະກຳ ແລະ ຄວາມເຂັ້ມແຂງ ໃນວັນ MSME ອາຊຽນ 2024!
ບັນດາປະເທດພາກພື້ນອາຊຽນກໍາລັງເລັ່ງພັດທະນາປະເທດຂອງຕົນໃຫ້ສາມາດຫັນເປັນເສດຖະກິດດີຈີຕອນ ພ້ອມກັບເສດຖະກິດແບບຍືນຍົງ ເພື່ອກະກຽມໃຫ້ບັນລຸເປົ້າຫມາຍ 2025 ທີ່ໄດ້ວາງໄວ້. ເນື່ອງໃນໂອກາດວັນຈຸນລະວິສາຫະກິດ, ຂະໜາດນ້ອຍ ແລະ ກາງ (ຈນກ ຫລື MSME) ສາກົນ ພ້ອມກັບ ສປປ ລາວເປັນປະທານຈັດກອງປະຊຸມອາຊຽນ, ກະຊວງອຸດສາຫະກຳ ແລະ ການຄ້າ ແລະ ຄູ່ຮ່ວມພັດທະນາ ໄດ້ຮ່ວມກັນຈັດກອງປະຊຸມທາງໄກ ຂຶ້ນທີ່ນະຄອນຫລວງວຽງຈັນ, ພາຍໃຕ້ຫົວຂໍ້ “ການສົ່ງເສີມນະວັດຕະກໍາ ແລະ ສ້າງຄວາມເຂັ້ມແຂງ ໃຫ້ແກ່ ຈນກ ເພື່ອອະນາຄົດທີ່ຍືນຍົງ."
ຜູ້ຕາງຫນ້າຈາກຫລາຍພາກສ່ວນ, ທັງພາກລັດ ແລະ ພາກເອກະຊົນ, ຈາກຫນ່ວຍງານ ແລະ ອົງການຕ່າງໆທີ່ເຮັດວຽກຕິດພັນກັບອາຊຽນ, ປະມານ 100 ທ່ານໄດ້ໃຫ້ກຽດເຂົ້າຮ່ວມ. ກອງປະຊຸມໄດ້ທົບທວນບົດບາດສຳຄັນຂອງ MSMEs ໃນການສົ່ງເສີມການພັດທະນາເສດຖະກິດ-ສັງຄົມ ແລະ ປະກອບສ່ວນສໍາຄັນເຮັດໃຫ້ປະເທດສາມາດບັນລຸເປົ້າໝາຍການພັດທະນາແບບຍືນຍົງໃນປີ 2030. ພ້ອມກັນນັ້່ນ, ຍັງໄດ້ມີິການສົນທະນາໃນຫົວຂໍ້ທີ່ຫນ້າສົນໃຈໃນຂົງເຂດ ການພັດທະນາ ຈນກ, ເຊັ່ນ: ສ້າງແນວທາງການພັດທະນາ ແລະ ເຊື່ອມສານລະບົບ e-commerce ໃຫ້ ຈນກ ສາມາດນໍາໃຊ້ນະວັດຕະກໍາດັ່ງກ່າວໄດ້ຫລາຍຂຶ້ນ ແລະ ການຮັບມືກັບອຸປະສັກຈາກລະບົບຕ່ອງໂສ້ການຜະລິດ. ນອກຈາກນັ້ນ, ບັນດາທຸລະກິດທ້ອງຖິ່ນຍັງໄດ້ແລກປ່ຽນບົດຮຽນ, ປະສົບການປະຕິບັດຕົວຈິງ ແລະ ປະສົບການທີ່ ສ້າງແຮງບັນດານໃຈໃຫ້ແກ່ເຈົ້າຂອງຫົວຫນ່ວຍ ຈນກ ອື່ນໆ.
ການສົ່ງເສີມການມີສ່ວນຮ່ວມຂອງ ຈນກ ເຂົ້າໃນຕະຫລາດສາກົນ ຈໍາເປັນຕ້ອງໄດ້ຈັດຕັ້ງປະຕິບັດວຽກງານຕາມແຜນຍຸດທະສາດ, ທັງພະແນກ ແລະ ກົມກອງທີ່ກ່ຽວຂ້ອງກັບການວາງນະໂຍບາຍ ແລະ ຫົວຫນ່ວຍທຸລະກິດ.
ເນື້ອໃນສໍາຄັນຂອງກອງປະຊຸມປະກອບມີ:
- ສ້າງຄວາມເຂັ້ມແຂງໃນການປັບຕົວ ແລະ ເພີ່ມຄວາມຫມັ້ນຄົງໃຫ້ແກ່ ຈນກ ເພື່ອໃຫ້ສາມາດຮັບມືກັບກັບວິກິດການ ແລະ ສິ່ງທ້າທາຍຕ່າງໆ.
- ຫມູນໃຊ້ການຮ່ວມມືລະຫວ່າງບັນດາປະເທດເພື່ອນບ້ານໃນການສົ່ງເສີມການຄ້າຂ້າມຊາຍແດນ ເພື່ອສ້າງຄວາມສາມາດໃນການແຂ່ງຂັນຢູ່ໃນຕະຫລາດສາກົນ, ໂດຍສະເພາະແມ່ນການຮ່ວມມືລະຫວ່າງບັນດາປະເທດອາຊຽນ.
- ອໍານວຍຄວາມສະດວກໃຫ້ແກ່ການຄ້າແບບຫນຶ່ງດຽວ ໂດຍຜ່ານການລິເລີ່ມໃນລະດັບພາກພື້ນ, ເຊັ່ນ: ພາສີປະຕູດຽວອາຊຽນ (ASW) ແລະ ເລກລະຫັດວິສາຫະກິດຂອງນິຕິບຸກຄົນໃນອາຊຽນ (UBIN).
ກອງປະຊຸມນີ້ ແມ່ນການຮ່ວມມືລະຫວ່າງ ທະນາຄານໂລກ ແລະ ຫ້ອງການ GIZ ພາຍໃຕ້ແຜນງານການຮ່ວມມື ASEAN-German ໃນການພັດທະນາເສດຖະກິດແບບຍືນຍົງ ໂດຍຜ່ານໂຄງການ ASEAN SME II ໂດຍໄດ້ຮັບການສະໜັບສະໜູນຈາກລັດຖະບານເຢຍລະມັນ (BMZ).