ກອງປະຊຸມຄະນະສະເພາະກິດຄັ້ງທຳອິດ ຂອງໂຄງການຮ່ວມມືກ່ຽວກັບການຄຸ້ມຄອງນ້ຳຂ້າມຊາຍແດນຈາກອຸທົກກະໄພ ແລະ ໄພແຫ້ງແລ້ງ

ກອງປະຊຸມຄະນະສະເພາະກິດຄັ້ງທຳອິດ ຂອງໂຄງການຮ່ວມມືກ່ຽວກັບການຄຸ້ມຄອງນ້ຳຂ້າມຊາຍແດນຈາກອຸທົກກະໄພ ແລະ ໄພແຫ້ງແລ້ງ ທີ່ຈັດຂຶ້ນໃນວັນທີ 13 ມິຖຸນາ ປີ2024 ທີ່ບາງກອກ, ປະເທດໄທ.

ກອງປະຊຸມໄດ້ປຶກສາຫາລື ພ້ອມທັງ ຈັດລຽງວຽກງານບູລິມະສິດເບື້ອງຕົ້ນ ກ່ຽວກັບກອບໜ້າວຽກ, ແຜນຈັດຕັ້ງປະຕິບັດວຽກງານຂອງຄະນະກຳມະການຮ່ວມ, ໂຄງຮ່າງການຈັດຕັ້ງຂອງຄະນະດັ່ງກ່າວ ແລະ ແຫຼ່ງເງິນບໍລິຫານ. ກອງປະຊຸມ ເຫັນດີກັບເນື້ອໃນຂອງກອບໜ້າວຽກ ແລະ ໄດ້ປະກອບຄຳເຫັນເພີ່ມເຕິມໃສ່ເອກະສານສະບັບນີ້ ພ້ອມທັງຮຽກຮ້ອງໃຫ້ກອງເລຂາຄະນະກຳມະທິການແມ່ນ້ຳຂອງສາກົນນຳເອົາຄຳເຫັນຕ່າງໄປພິຈາລະນາເພື່ອປັບປຸງກອບໜ້າວຽກສະບັບນີ້ ແລະ ໃຫ້ກອງເລຂາສົ່ງສະບັບປັບປຸງໃຫ້ບັນດາປະເທດ ເພື່ອກວດສອບເນື້ອໃນລາຍລະອຽດກ່ອນກອງປະຊຸມຄັ້ງຕໍ່ໄປ.

ໂຄງການຮ່ວມມືດັ່ງກ່າວນີ້ ໄດ້ສ້າງຕັ້ງຂຶ້ນມາເພື່ອຫລຸດຜ່ອນຜົນກະທົບຈາກອຸທົກກະໄພ ແລະ ໄພແຫ້ງແລ້ງທີ່ເກີດຂຶ້ນຢູ່ອ່າງຮັບນໍ້າຍ່ອຍແມ່ນໍ້າຂອງລະຫວ່າງປະເທດກໍາປູເຈຍ ແລະ ປະເທດໄທ. ໂຄງການຮ່ວມມືດັ່ງກ່າວໄດ້ມີຫມາກຜົນສໍາເລັດຫລາຍຢ່າງ, ລວມທັງ ການພັດທະນາແຜນແມ່ບົດກ່ຽວກັບວຽກງານອຸທົກກະໄພ ແລະ ໄພແຫ້ງແລ້ງ, ລະບົບແຜນທີ່ອອນລາຍຂອງອ່າງຮັບນໍ້າ, ແລະ ແຜນຈັດຕັ້ງປະຕິບັດວຽກງານບົດບາດຍິງ-ຊາຍ ແລະ ຜູ້ດ້ອຍໂອກາດ ຫລື ກຸ່ມສ່ຽງ.

ໂຄງການຮ່ວມມືດັ່ງກ່າວແມ່ນຫນຶ່ງໃນອົງປະກອບໂຄງການພາກພື້ນຂອງແຜນງານການຮ່ວມມືກ່ຽວກັບນໍ້າຂ້າມຊາຍແດນໃນລຸ່ມແມ່ນໍ້າຂອງ ໄລຍະ II (TWC II) ເພື່ອສະຫນັບສະຫນູນຂໍ້ສະເຫນີກ່ຽວກັບການພັດທະນາ ແລະ ການຄຸ້ມຄອງນໍ້າຂ້າມຊາຍແດນໃນລຸ່ມແມ່ນໍ້າຂອງລະຫວ່າງ ປະເທດກໍາປູເຈຍ ແລະ ປະເທດໄທ ເພື່ອລະດົມທຶນເຂົ້າໃນການຈັດຕັ້ງປະຕິບັດແຜນແມ່ບົດກ່ຽວກັບວຽກງານອຸທົກກະໄພ ແລະ ໄພແຫ້ງແລ້ງ, ລວມທັງການຮ່ວມມືເພື່ອພັດທະນາ ແລະ ຈັດຕັ້ງປະຕິບັດລະບົບເຕືອນໄພລ່ວງຫນ້າ.

ສໍາລັບຂໍ້ມູນເພີ່ມຕື່ມກ່ຽວກັບໂຄງການ TWC II, ທ່ານສາມາດອ່ານຕໍ່ໄດ້ທີ່ Promoting the Mekong River Commission (MRC) for improved joint water solutions - giz.de