ກອງປະຊຸມຮ່ວມມືດ້ານວິຊາການ ຄັ້ງທີ່ສາມຂອງແຜນງາການຮ່ວມມືລະຫວ່າງ ລາວ-ເອີຣົບໃນວຽກງານປົກຄອງ

ໃນວັນທີ 5 ມິຖຸນາ 2024 ທີ່ນະຄອນຫຼວງວຽງຈັນ, ຄູ່ຮ່ວມພັດທະນາ (ຜູ້ໃຫ້ທືນ) ແລະ ຄູ່ຮ່ວມຈັດຕັ້ງປະຕິບັດຂອງແຜນງານການຮ່ວມມືລະຫວ່າງລັດຖະບານລາວ-ເອີຣົບ ​“ການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ” (ແຜນງານ CEGGA II) ໄດ້ທົບທວນຄວາມຄືບໜ້າການຈັດຕັ້ງປະຕິບັດແຜນດໍາເນີນງານ ແລະ ຄາດໝາຍ ໃນໄລຍະ 6 ເດືອນຜ່ານມາ ແລະ ຮັບຮອງເອົາແຜນດໍາເນີນງານ ແລະ ຄາດໝາຍ 1 ປີຕໍ່ໜ້າ.

ກອງປະຊຸມໄດ້ຈັດຂື້ນໂດຍຫ້ອງການກະຊວງພາຍໃນ ໃນນາມກອງເລຂາແຜນງານ CEGGA. ນີ້ເປັນກອງປະຊຸມຮ່ວມມືດ້ານວິຊາການຄັ້ງທີ່ສາມຂອງແຜນງານ CEGGA ໄລຍະ 2. ກອງປະຊຸມດັ່ງເປັນເວທີສໍາລັບແລກປ່ຽນຄຳຄິດເຫັນລະຫວ່າງຄູ່ຮ່ວມຈັດຕັ້ງປະຕິບັດຝ່າຍລາວ ແລະ ທີມເອີຣົບ ເພື່ອທົບທວນຄວາມຄືບໜ້າໃນການຈັດຕັ້ງປະຕິບັດແຜນງານ CEGGA ແລະ ເຫັນດີເປັນເອກະພາບຕໍ່ກັບແຜນວຽກບຸລິມະສິດໃນ 1 ປີຕໍ່ໜ້າ. ກອງປະຊຸມໄດ້ຮວມເອົາບັດດາຄູ່ຮ່ວມຈັດຕັ້ງປະຕິບັດຫຼັກຂອງທັງສາມອົງປະກອບຈາກສູນກາງ ແລະ ສອງແຂວງເປົ້າໝາຍ ແຂວງຄຳມ່ວນ ແລະ ຫຼວງພະບາງ ເຊັ່ນ: ອົງການນິຕິບັນຍັດ, ຂະແໜງພາຍໃນ ແລະ ຂະແໜງຍຸຕິທຳ ແລະ  ຈິໄອແຊັດ (GIZ)  ພ້ອມດ້ວຍຜູ້ຕາງໜ້າຈາກອົງການຮ່ວມມືເພື່ອການພັດທະນາ ປະເທດສະວິສເຊີແລນ, ສະຖານທູດເຢຍລະມັນ ແລະສະຫະພາບອົບຣົບ.

ກອງປະຊຸມໄດ້ດຳເນີນໄປດ້ວຍບັນຍາກາດຟົດຟື້ນ. ຜູ້ເຂົ້າຮ່ວມກອງປະຊຸມ ໄດ້ປະກອບຄຳຄິດເຫັນຢ່າງກົງໄປກົງມາວ່າ ກິດຈະກຳຫຼັກ ແລະ ຄາດໝາຍລວມທັງວິທີການດຳເນີນງານທີ່ເປັນນະວັດຕະກຳໃໝ່ຂອງແຜນງານ CEGGA ໄລຍະ 2 ແມ່ນສອດຄ່ອງກັບແຜນວຽກບຸລິມະສິດຂອງຂະແໜງການ. ເພື່ອນຳໃຊ້ຊັບພະຍາກອນໃຫ້ມີປະສິດພາບ. ໃນກອງປະຊຸມດັ່ງກ່າວ ຜູ້ເຂົ້າຮ່ວມກອງປະຊຸມ ໄດ້ເຫັນດີ ແລະ ຮັບຮອງເອົາແຜນດຳເນີນງານ ແລະ ຄາດໝາຍ ຂອງແຜນງານ CEGGAສໍາລັບປີ 2024/2025.

ແຜນງານເຊກາ (CEGGA)  ເປັນຈຸດລິເລີ່ມການຮ່ວມມືລະຫວ່າງ ລັດຖະບານຂອງ ສປປ ລາວ ແລະ ຄູ່ຮ່ວມພັດທະນາ “ທີມເອີຣົບ”  ເຊີ່ງລວມມີ: ສະຫະພາບ ເອີຣົບ, ລັດຖະບານເຢຍລະມັນ ແລະ ລັດຖະບານສະວິສເຊີແລນ. ຈິໄອແຊັດ (GIZ) ໄດ້ຮັບມອບໝາຍໃຫ້ຈັດຕັ້ງປະຕິບັດແຜນງານຮ່ວມກັບກະຊວງພາຍໃນ ແລະ ຄູ່ຮ່ວມງານທີ່ກ່ຽວຂ້ອງ ເພື່ອໃຫ້ບັນລຸເປົ້າໝາຍລວມໃນການເພີ່ມທະວີການມີສ່ວນຮ່ວມຂອງປະຊາຊົນໃນຂະບວນການພັດທະນາປະເທດຊາດ ໂດຍສົ່ງເສີມການປົກຄອງທີ່ດີ, ການສ້າງລັດທີ່ປົກຄອງດ້ວຍກົດໝາຍ ແລະ ການເຂົ້າເຖິງຄວາມຍຸຕິທຳ.