ຍົກສູງພາວະຄວາມເປັນຜູ້ນຳໃຫ້ແກ່ສະມາຊິກສະພາ ແລະ ພະນັກງານເພດຍິງ ສະພາແຫ່ງຊາດ ແລະ ປະຊາຊົນຂັ້ນແຂວງ
ແຜນງານ ການມີສ່ວນຮ່ວມຂອງປະຊາຊົນ ຕໍ່ ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດຫມາຍ ໄລຍະ 2 (CEGGA II) ມີເປົ້າໝາຍຍົກສູງພາວະຄວາມເປັນຜູ້ນຳໃຫ້ແກ່ສະມາຊິກສະພາ ແລະ ພະນັກງານເພດຍິງ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເພື່ອສົ່ງເສີມບົດບາດ ແລະ ຄວາມສະເໝີພາບລະຫວ່າງຍິງ-ຊາຍ. ໂດຍການຮ່ວມມືກັບກະຊວງພາຍໃນເຊິ່ງເປັນກອງເລຂາແຜນງານ CEGGA ໄດ້ຈັດການຝືກອົບຮົມໃຫ້ແກ່ສະມາຊິກສະພາ ແລະ ພະນັກງານເພດຍິງ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃຫ້ມີທັກສະຄວາມເປັນຜູ້ນໍາ, ມີເຄື່ອງມື ແລະ ມີຍຸດທະສາດທີ່ຈຳເປັນ ເພື່ອສົ່ງເສີມຄວາມກ້າວໜ້າຄວາມເປັນຜູ້ນໍາເພດຍິງ ແລະ ການເສື່ອມສານບົດບາດຍິງ-ຊາຍໃນວຽກງານຂອງສະພາ ພ້ອມທັງເປັນການເພີ່ມທະວີຄວາມສຳຄັນເຖິງບົດບາດຍິງ-ຊາຍໃນຂະບວນການຕັດສິນບັນຫາໃນວຽກງານສະພາໂດຍສະເພາະກິດຈະກຳການມີສ່ວນຮ່ວມຂອງປະຊາຊົນເຊັ່ນ: ວຽກງານສາຍດ່ວນ, ພິຈະລາຄຳຮ້ອງຂໍຄວາມເປັນທຳ, ການປຶກສາຫາລື, ການລົງພົບປະປະຊາຊົນ, ແລະ ການຕິດຕາມກວດກາ.
ທ່ານ ນາງ ແກ້ວລາ ມະນີຈິດ, ສະມາຊິກສະພາປະຊາຊົນຂັ້ນແຂວງເພດຍິງ ແລະ ເປັນເລຂາທິການສະພາປະຊາຊົນແຂວງຫຼວງພະບາງ ໄດ້ບອກເລົ່າກ່ຽວກັບການເລື່ອງລາວຂອງລາວໃນທີ່ປະຊຸມວ່າ, ແມ່ຍິງບໍ່ຄວນຢຸດການທຸ່ມເທຕໍ່ວຽກງານ ແລະ ຕ້ອງກ້າຫານໃນການສະແດງອອກ. ທ່ານນາງ ແກ້ວລາຍັງໄດ້ກ່າວວ່າ “ແມ່ຍິງຕ້ອງມີ 3 ຢ່າໃນຕົນເອງ: ຢ່າຢຸດຄິດພັດທະນາຕົນ, ຢ່າຖືບັນຫາ ແລະ ສິ່ງທ້າທາຍເປັນອຸປະສັກໃນການເຮັດບົດບາດນຳພາ, ຢ່າຢຸດທີ່ຈະສ້າງໂອກາດໃຫ້ແມ່ຍິງຄົນອື່ນໄດ້ມີຄວາມກ້າວໜ້າ”
ຄວາມກ້າວໜ້າຂອງ ທ່ານນາງ ແກ້ວລາ ສູ່ຕໍາແໜ່ງລະດັບສູງ ແມ່ນຍ້ອນການສູ້ຊົນ ແລະ ອົດທົນ. ໃນເບື້ອງຕົ້ນ, ທ່ານນາງ ແກ້ວລາ ແມ່ນຂາດຄວາມໝັ້ນໃຈ ແລະ ສົງໄສໃນຄວາມສາມາດຂອງຕົນວ່າຈະເຮັດວຽກໄດ້ດີບໍ ແລະ ຢ້ານການຍອມຮັບຈາກເພື່ອນຮ່ວມງານ ຍ້ອນລະດັັບການສຶກສາ ແລະ ເສດຖະກິດຄອບຄົວ, ແລະ ມາຈາກຊົນນະບົດ. ທ່ານ ນາງ ແກ້ວລາ ໄດ້ເຮັດວຽກຫຼາຍກວ່າ 12 ປີ ຢູ່ໃນບ້ານເກີດຂອງຕົນ ກ່ອນທີ່ຈະໄດ້ຮັບການເລື່ອນຊັ້ນເປັນປະທານສະຫະພັນແມ່ຍິງເມືອງ. ທ່ານນາງ ແກ້ວລາ ບໍ່ເຄີຍຢຸດການຮຽນຮູ້ ແລະ ອຸທິດຕົນຕໍ່ໜ້າວຽກການງານ, ດ້ວຍຜົນງານອັນດີເດັ່ນ ແລະ ການທຸ່ມເທໃນການພັດທະນາຊົນນະບົດໃນໄລຍະ 15 ປີ ໄດ້ເຮັດໃຫ້ລາວສະໝັກເປັນສະມາຊິກສະພາປະຊາຊົນຂັ້ນແຂວງ. ປະຈຸບັນນີ້, ທ່ານນາງ ແກ້ວລາ ເປັນຕົວແທນໃຫ້ແກ່ປະຊາຊົນ ແລະ ສືບຕໍ່ສະຫນັບສະຫນູນການສ້າງຄວາມເຂັ້ມແຂງໃຫ້ແກ່ບັນດາເພດຍິງ.
ທ່ານນາງ ແກ້ວລາ ສະແດງຄວາມຂອບໃຈຕໍ່ແຜນງານ CEGGA II ທີ່ເຮັດໃຫ້ລາວໄດ້ມີໂອກາດໄດ້ມາແລກປ່ຽນບອກເລົ່າປະສົບການ ແລະ ແຮງບັນດານໃຈ ພ້ອມທັງໄດ້ຮຽນຮູ້ສິ່ງໃຫມ່ໆ ແລະ ສ້າງເຄື່ອຂ່າຍກັບບັນດາສະມາຊິສະພາເພດຍິງທ່ານອື່ນໆ. ທ່ານນາງ ແກ້ວລາ ໄດ້ພະຍາມນຳໃຊ້ສິ່ງທີ່ໄດ້ຮຽນຮູ້ເພື່ອໄປຖ່າຍທອດໃຫ້ແກ່ບັນດາເພື່ອນຮ່ວມງານເພດຍິງໃນອົງການຈັດຕັ້ງຂອງລາວ ແລະ ປະຕິບັດພາລະບົດບາດສະມາຊິກສະພາ, ເພື່ອຮັບປະກັນການຍົກສູງສົ່ງເສີມບົດບາດຂອງເພດຍິງ.
ຜ່ານເລື່ອງລາວຂອງທ່ານນາງ ແກ້ວລາ, ແຜນງານ CEGGA II ໄດ້ຍົກໃຫ້ເຫັນເຖິງຜົນໄດ້ຮັບທີ່ດີຂອງການຍົກສູງພາວະຄວາມເປັນຜູ້ນໍາເພດຍິງ, ແລະ ຍັງຊີ້ໃຫ້ເຫັນເຖິງ ຄວາມອົດທົນ, ການສຶກສາ, ແລະ ເຄືອຂ່າຍຊ່ວຍເຫຼື່ອເຊິ່ງກັນ ແລະ ກັນ.
ແຜນງານ CEGGA ແມ່ນເປັນການລິເລີ່ມຮ່ວມມື ລະຫວ່າງ ລັດຖະບານ ແຫ່ງ ສປປ ລາວ ແລະ ຄູ່ຮ່ວມງານ “ທີມເອີຣົບ” ປະເທດສະວິສເຊີແລນ, ປະເທດເຢຍລະມັນ, ແລະ ສະຫະພາບເອີຣົບ. ອົງການ ຮ່ວມມືລາວ-ເຢຍລະມັນ Deutsche Gesellschaft für Internationale Zusammenarbeit (GIZ) ໄດ້ຖືມອບໝາຍໃຫ້ຈັດຕັ້ງປະຕິບັດ ແຜນງານການຮ່ວມມືຂອງທີມເອີຣົບ ຮ່ວມກັບ ຄູ່ຮ່ວມງານຝ່າຍ ລາວ ເພື່ອປະກອບສ່ວນເຂົ້າໃນການພັດທະນາສ້າງສາປະເທດຊາດ ໂດຍການເພີ້ມທະວີວຽກງານການປົກຄອງທີ່ດີ, ສິດທິມະນຸດ ແລະ ການສ້າງລັດທີ່ປົກຄອງດ້ວຍກົດໝາຍ ແລະ ການເຂົ້າເຖິງກົດໝາຍ.