ແຜນງານ CEGGA ໄລຍະ II ພ້ອມດ້ວຍ ຫ້ອງການ ຈາກກະຊວງພາຍໃນຮ່ວມກັນທົບທວນການຈັດຕັ້ງປະຕິບັດແຜນງານ ແລະ ວາງທິດທາງໃນຕໍ່ຫນ້າ

ໃນວັນທີ 20 ພຶດສະພາ 2024, ທີ່ນະຄອນຫລວງວຽງຈັນ, ແຜນງານ CEGGA  ໄລຍະ II  ແລະ ຫ້ອງການກະຊວງພາຍໃນ, ໃນນາມກອງເລຂາແຜນງານ CEGGA ຈັດກອງປະຊຸມບໍລິຫານ-ຄຸ້ມຄອງ ແຜນງານ ເພື່ອທົບທວນຄວາມຄືບຫນ້າການຈັດຕັ້ງປະຕິບັດແຜນດໍາເນີນງານ ແລະ ຄາດຫມາຍຂອງແຕ່ລະອົງຝປະກອບ ປະຈໍາປີ 2023-2024 ແລະ ກໍານົດແຜນກິດຈະກໍາ ແລະ ຄາດຫມາຍບູລິມະສິດ ເພື່ອຮ່ວມກັນກໍານົດທິດທາງແຜນດໍາເນີນງານຕໍ່ຫນ້າ ປະຈໍາປີ 2024-2025.

ກອງປະຊຸມດັ່ງກ່າວໄດ້ຮັບກຽດການເປັນປະທານຂອງທ່ານ ເພັດສົມພອນ ສຸວັນມີໄຂ, ຮອງຫົວຫນ້າຫ້ອງການກະຊວງພາຍໃນ ແລະ ທ່ານນາງ ບາບາຣາ ມາຍຄ໌ (Barbara Meincke), ຜູ້ອໍານວຍການແຜນງານ CEGGA, ເຊິ່ງມີຄູ່ຮ່ວມຈັດຕັ້ງປະຕິບັດຈາກກະຊວງພາຍໃນ, ສະພາແຫ່ງຊາດ ແລະ ກະຊວງຍຸດຕິທໍາ ພ້ອມກັບ ພະແນກຕ່າງໆຈາກ, ເຊັ່ນ ອົງການນິຕິບັນຍັດ, ຂະແຫນງພາຍໃນ ແລະ ຂະແຫນງຍຸດຕິທໍາ ຈາກແຂວງຫລວງພະບາງ ແລະ ຄໍາມ່ວນ.

ກອງປະຊຸມໄດ້ດໍາເນີນໄປດ້ວຍຄວາມຟົດຟື້ນ. ຜູ້ເຂົ້າຮ່ວມໄດ້ແລກປ່ຽນຄໍາຄິດເຫັນ ແລະ ນໍາສະເຫນີທິດທາງແຜນການ ແລະ ຄວາມຫມາຍໃນການປະສານງານ ແລະ ເຮັດວຽກຮ່ວມກັນຂອງແຕ່ລະອົງປະກອບເພື່ອໃຫ້ບັນລຸຜົນສໍາເລັດຕາມແຕ່ລະຕົວຊີ້ວັດ ແລະ ເປົ້າຫມາຍລວມຂອງແຜນການ. ນອກຈາກນີ້, ຜູ້ເຂົ້າຮ່ວມຍັງໄດ້ສົນທະນາແລກປ່ຽນກ່ຽວກັບຜົນໄດ້ຮັບ ແລະ ຜົນກະທົບທີ່ຄາດຫວັງໃນການຈັດຕັ້ງປະຕິບັດແຜນງານ.

ແຜນງານການມີສ່ວນຮ່ວມຂອງປະຊາຊົນ ຕໍ່ວຽກງານການປົກຄອງທີ່ດີ ແລະ ສ້າງລັດທີ່ປົກຄອງດ້ວຍກົດຫມາຍ (CEGGA) ໄລຍະ II ແມ່ນການຮ່ວມມືລະຫວ່າງລັດຖະບານ ແຫ່ງ ສປປ ລາວ ແລະ ຄູ່ຮ່ວມພັດທະນາ "ທີມເອີຣົບ", ເຊິ່ງປະກອບມີ ລັດຖະບານ ສະວິດສເຊີແລນ, ລັດຖະບານເຢຍລະມັນ ແລະ ສະຫະພາບເອີຣົບ ໂດຍມອບຫມາຍໃຫ້ ຫ້ອງການ GIZ ເປັນຜູ້ຮັບຜິດຊອບຈັດຕັ້ງປະຕິບັດແຜນງານດັ່ງກ່າວຮ່ວມກັບກະຊວງພາຍໃນ ແລະ ຄູ່ຮ່ວມພັດທະນາທີ່ກ່ຽວຂ້ອງ ເພື່ອໃຫ້ບັນລຸເປົ້າຫມາຍລວມໃນການເພີ່ມທະວີການມີສ່ວນຮ່ວມຂອງປະຊາຊົນໃນຂະບວນການພັດທະນາສ້າງສາປະເທດຊາດ ດ້ວຍການສົ່ງເສີມການປົກຄອງທີ່ດີ, ການສ້າງລັດທີ່ປົກຄອງດ້ວຍກົດຫມາຍ ແລະ ການເຂົ້າເຖິງກົດຫມາຍ.