ການຮ່ວມມື ລະຫວ່າງ ທີມເອີໂຣບ ເເລະ ສປປ ລາວ ເພື່ອການນໍາໃຊ້ ແລະ ອະນຸລັກປ່າໄມ້ແບບຍືນຍົງ

ວັນທີ: 15 ພຶດສະພາ 2024

ທີມເອີໂຣບ ຮ່ວມມື ກັບ ສປປ ລາວ ເພື່ອຍົກລະດັບການຄ້າ, ການລົງທຶນ ແລະ ການເຊື່ອມໂຍງ ແບບຍືນຍົງ ແລະ ທົ່ວເຖິງ ໃນຂະແໜງ ກະສິກໍາ ແລະ ປ່າໄມ້ (TICAF). ໃນຖານະທີ່ເປັນສ່ວນໜື່ງຂອງການການເປັນຄູ່ຮ່ວມງານດ້ວຍການໃຫ້ທຶນຊ່ວຍເຫລືອແບບຫລາຍຝ່າຍ, ສະຫະພາບເອີໂຣບ (EU) ແລະ ລັດຖະບານເຢຍລະມັນໄດ້ປະກອບສ່ວນສະໜັບສະໜູນ 22 ລ້ານ ຢູໂຣ ໃຫ້ເເກ່ ສປປ ລາວ ເພື່ອເພີ່ມທະວີການມີສ່ວນຮ່ວມ ຂອງຊຸມຊົນໃນທ້ອງຖິ່ນ ໂດຍສະເພາະແມ່ນ ແມ່ຍິງ ໃນການສ້າງຄວາມເຂັ້ມແຂງ ໃຫ້ແກ່ຕ່ອງໂສ້ມູນຄ່າທູລະກິດໄມ້ ເພື່ອນໍາໃຊ້ໃຫ້ມີຄວາມຍືນຍົງ ແລະ ອະນຸລັກປ່າໄມ້.. ໂຄງການນີ້ຈະໄດ້ຖືກຈັດຕັ້ງປະຕິບັດໂດຍ Deutsche Gesellschaft für Internationale Zusammenarbeit (GIZ) GmbH ໂດຍຜ່ານໂຄງການຮ່ວມມືແບບສອງຝ່າຍດ້ານວິຊາການ “ການປົກປັກຮັກສາ ແລະ ຊົມໃຊ້ລະບົບນິເວດປ່າໄມ້ ແລະ ຊີວະນາໆພັນແບບຍືນຍົງ Protection and Sustainable Use of Forest Ecosystems and Biodiversity (ProFEB). ”

ໃນກອງປະຊຸມປຶກສາຫາລືໃນວັນທີ 15 ພຶດສະພາ, ດຣ ທອງພັດ ວົງມະນີ, ຮອງລັດມົນຕີກະຊວງກະສິກໍາ ແລະປ່າໄມ້ໄດ້ກ່າວວ່າ ‘ຂ້າພະເຈົ້າ ຂໍສະແດງຄວາມຂອບໃຈຢ່າງສຸດໃຈຕໍ່ ອີຢູ ແລະ ລັດຖະບານເຢຍລະມັນທີ່ໄດ້ໃຫ້ການຮ່ວມມືທີ່ດີ ເເລະ ສະໜັບສະໜູນຊ່ວຍເຫລືອເເກ່ລັດຖະບານລາວ ໃນວຽກງານການປົກປັກຮັກສາ ເເລະ ອະນຸລັກປ່າໄມ້. ທ່ານໄດ້ສືບຕໍ່ກ່າວວ່າ ‘ກອງປະຊຸມປຶກສາຫາລື ເເລະ ວາງເເຜນວຽກງານໃນຄັ້ງນີ້ແມ່ນມີຄວາມໝາຍສຳຄັນ ເເລະ ເປັນເວທີເປີດກ້ວາງ ໃຫ້ເເກ່ການປຶກສາຫາລືດ້ານວິຊາການ ແບບກົງໄປກົງມາ ກ່ຽວກັບການວາງເເຜນວຽກ, ການຮ່ວມມື, ແລະ ການກໍານົດບັນດາສິ່ງຄາດໝາຍຮ່ວມກັນ ເພື່ອບັນລຸໃນຊຸມປີຕໍ່ໜ້າ.  ຜົນຂອງຂອງການປຶກສາຫາລືນີ້ ຈະເປັນເຄື່ອງມືສຳຄັນ ໃນການສ້າງແຜນງານທີ່ມີຄວາມຍືນຍົງຂອງພວກເຮົາໃນການຊົມໃຊ້ ແລະ ອະນຸລັກປ່າໄມ້ແບບຍືນຍົງ.  ພວກເຮົາຫວັງວ່າໂຄງການນີ້ຈະສ້າງຄວາມເຂັ້ມແຂງໃຫ້ແກ່ບັນດາຊຸມຊົນຂັ້ນທ້ອງຖີ່ນ, ໂດຍສະເພາະແມ່ນແມ່ຍິງ, ແລະ ຫວັງວ່າໂຄງການນີ້ຈະນໍາພາທຸກຄົນກ້າວສູ່ອະນາຄົດອັນສົດໃສ.’

ພະນະທ່ານ ນາງ ອີນາ ມາຊີລີອອນນີເຕ (Ina Marčiulionytė), ເອກອັກຄະລັດຖະທູດ ອີຢູ ປະຈໍາລາວ, ໄດ້ກ່າວເນັ້ນຄວາມສໍາຄັນວ່າ ‘ອີຢູ ແລະ ສປປ ລາວ ໄດ້ຮ່ວມມືກັນໃນຫລາຍຂົງເຂດວຽກງານເພື່ອສະໜັບສະໜູນບັນດາເປົ້າໝາຍການພັດທະນາເສດຖະກິດຂອງ ສປປ ລາວ. ວຽກໂຄງການນີ້ ແມ່ນສ່ວນໜື່ງຂອງແຜນງານທີ່ສໍາຄັນພາຍໃຕ້ຄວາມລິເລີ່ມຂອງທີມງານພັດທະນາສີຂຽວຂອງຢູໂຣບ (TEI) ສໍາລັບ ສປປ ລາວ ເພື່ອຍົກລະດັບການຄ້າ, ການລົງທຶນ ແລະ ການເຊື່ອມໂຍງ ແບບຍືນຍົງ ແລະ ທົ່ວເຖິງ ໃນຂະແໜງ ກະສິກໍາ ແລະ ປ່າໄມ້. ການຮ່ວມມືພາຍໃຕ້ TICAF ຈະປະກອບສ່ວນໃຫ້ແກ່ການເຕີບໂຕສີຂຽວ, ຍືນຍົງ ແລະ ມີສ່ວນຮ່ວມ ດ້ວຍການຍົກລະດັບການຜະລິດພາຍໃນ, ການປຸງແຕ່ງ, ການສົ່ງອອກ, ການເກັບລາຍຮັບພາຍໃນ, ການສ້າງວຽກເຮັດງານທໍາທີ່ມີຄຸນຄ່າ ໃນຕ່ອງໂສ້ມູນຄ່າເພີ່ມກາເຟ, ຊາ ແລະ ປ່າໄມ້ ຄຽງຄູ່ກັບການຊ່ວຍເຫຼືອ ສປປ ລາວ ໃນການຈັດຕັ້ງປະຕິບັດແຜນງານແຫ່ງຊາດ ເພື່ອປະກອບສ່ວນໃນການແກ້ໄຂບັນຫາການປ່ຽນແປງດິນຟ້າອາກາດ (NDC) ໂດຍການປົກປັກຮັກສາປ່າໄມ້ ແລະ ຊີວະນາໆພັນ.

ພະນະທ່ານ ນາງ ແອນເນັດເຕ ຄະນົບລັອກ (Annette Knobloch), ເອກອັກຄະລັດຖະທູດເຢຍລະມັນປະຈໍາລາວ ໄດ້ກ່າວວ່າ “ພວກຂ້າພະເຈົ້າຮູ້ສຶກດີໃຈທີ່ໄດ້ເຫັນວ່າລັດຖະບານລາວໄດ້ມີຄວາມຄືບໜ້າຢ່າງຫລວງຫລາຍໃນການບັນລຸເປົ້າໝາຍໃນການຄຸ້ມຄອງປ່າໄມ້, ຊີວະນາໆພັນ ແລະ ຊັບພະຍາກອນທໍາມະຊາດແບບຍືນຍົງໃນໄລຍະຊຸມປີຜ່ານມາ. ໂດຍການເສີມຂະຫຍາຍການປະກອບສ່ວນຂອງພວກຂ້າພະເຈົ້າໃຫ້ແກ່ໂຄງການທີ່ສໍາຄັນນີ້, ພວກຂ້າພະເຈົ້າມີຄວາມຫວັງຢ່າງໜັກແໜ້ນເພື່ອບັນລຸຜົນສໍາເລັດໄປພ້ອມກັບບັນດາຄູ່ຮ່ວມມງານຂອງພວກເຮົາ ແລະ ຈະສະໜອງຄວາມສາມາດໃຫ້ແກ່ບັນດາພາກສ່ວນກ່ຽວຂ້ອງເພື່ອສືບຕໍ່ລິເລີ່ມຂະບວນການຕ່າງໆຢ່າງມີຄວາມຍືນຍົງ.”  ທ່ານເອກອັກຄະລັດຖະທູດເຢຍລະມັນໄດ້ກ່າວຕໍ່ໄປວ່າ “ລັດຖະບານເຢຍລະມັນມີຄວາມໝາຍໝັ້ນທີ່ຈະສືບຕໍ່ການຮ່ວມມື ແລະ ສະໜັບສະໜູນລັດຖະບານ ສປປ ລາວ ເພື່ອສ້າງເງື່ອນໄຂການຮ່ວມມືທີ່ດີກວ່າເກົ່າ ແລະ ເພີ່ມຄວາມເຂັ້ມແຂງໃຫ້ແກ່ລັດຖະບານລາວ, ພາກເອກະຊົນ, ແລະ ອົງການຈັດຕັ້ງທາງສັງຄົມໃນການຄຸ້ມຄອງຊັບພະຍາກອນປ່າໄມ້ ແລະ ຊີວະນາໆພັນໂດຍການຊ່ວຍເຫລືອດ້ານວິຊາການຈາກອົງການ GIZ.”

ໂຄງການຮ່ວມນີ້ແມ່ນການສືບສານຈາກຜົນສໍາເລັດຂອງບັນດາໂຄງການໃນເມື່ອກ່ອນພາຍໃຕ້ແຜນງານ ProFEB ໂດຍທີ່ໂຄງການນີ້ຈະຈັດຕັ້ງປະຕິບັດບັນດາວຽກງານທີ່ເປັນພື້ນຖານໃນແຕ່ລະຂົງເຂດວຽກໂດຍຈະສຸມໃສ່ 1). ນະໂຍບາຍປ່າໄມ້: ອໍານວຍຄວາມສະດວກການປຶກສາຫາລື ແລະ ຊຸກຍູ້ການກໍານົດນະໂຍບາຍ ແລະ ກອບນິຕິກໍາເພື່ອເຮັດໃຫ້ຂະແໜງປ່າໄມ້ມີການເຮັດວຽກແບບມີສ່ວນຮ່ວມ, ເປັນມິດຕໍ່ຊີວະນາໆພັນ ແລະ ບໍ່ມີການທໍາລາຍປ່າ;  2) ການອະນຸລັກຊີວະນາໆພັນ:  ການສ້າງຄວາມເຂັ້ມແຂງໃຫ້ແກ່ບັນດາພາກສ່ວນປະຕິບັດງານຫລັກໃນ ສປປ ລາວ ເພື່ອການຮ່ວມມືລະຫວ່າງສະຖາບັນ ແລະ ການຮ່ວມມືລະຫວ່າງຊາຍແດນໃນການອະນຸລັກສັດປ່າ ແລະ ການຄຸ້ມຄອງອຸທິຍານແຫ່ງຊາດຫີນໜາມໜໍ່ ແລະ ການອະນຸລັກເຂດພູມີທັດອຸທິຍານ ຟອງຢາ-ເກບາງ; 3) ການສຶກສາ:  ເພີ່ມທະວີການສຶກສາຄົ້ນຄວ້າ, ການຝຶກອົບຮົມ, ແລະ ຄວາມສາມາດດ້ານວິຊາການເພື່ອປັບປຸງການຊົມໃຊ້ ແລະ ການຄຸ້ມຄອງຊັບພະຍາກອນປ່າໄມ້ໃຫ້ດີຂືຶ້ນໃນ ສປປ ລາວ;  4) ການຟື້ນຟູພູມີທັດປ່າໄມ້:  ການສ້າງຄູ່ຮ່ວມງານລະຫວ່າງພາກສ່ວນກ່ຽວຂ້ອງ, ເປັນຕົ້ນແມ່ນພາກເອກະຊົນ, ຊຸມຊົນຂັ້ນບ້ານ, ພາກສ່ວນລັດຖະບານ ແລະ ອົງການຈັດຕັ້ງທາງສັງຄົມເພື່ອສ້າງຄວາມເຂັ້ມແຂງໃນການຟື້ນຟູພູມີທັດປ່າໄມ້ໃຫ້ທົນທານກັບການປ່ຽນແປງດິນຟ້າອາກາດ ແລະ ການອະນຸລັກຊີວະນາໆພັນ; ແລະ 5) ການເພີ່ມມູນຄ່າຕ່ອງໂສ້: ການສ້າງຄູ່ຮ່ວມງານທຸລະກິດເພື່ອສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ຂະໜາດກາງເພື່ອການພັດທະນາມູນຄ່າຕ່ອງໂສ້ ຂອງຜະລິດຕະພັນເຄື່ອງປ່າຂອງດົງແບບຍືນຍົງ ແລະ ແບບສາມາດແຂ່ງຂັນໄດ້.

ໄລຍະທີ່ສາມຂອງໂຄງການນີ້ໄດ້ເລີ່ມຕົ້ນໃນເດືອນມັງກອນ 2024 ແລະ ຈະມີການຈັດຕັ້ງປະຕິບັດຈົນຮອດເດືອນມີນາ 2027.