ເພີ່ມທະວີການຮ່ວມມືລະຫວ່າງພາກລັດ ແລະ ອົງການຈັດຕັ້ງສັງຄົມລາວ ເພື່ອກ້າວໄປສູ່ການພັດທະນາແບບຍືນຍົງ

ວັນທີ 9-10 ພຶດສະພາ 2024, ແຜນງານ CEGGA ໄລຍະ II ສະໜັບສະໜູນກະຊວງພາຍໃນ ແລະ ຄະນະປະສານງານອົງການຈັດຕັ້ງສັງຄົມລາວ ຈັດກອງປະຊຸມພົບປະລະຫວ່າງພາກລັດ ແລະ ອົງການຈັດຕັ້ງສັງຄົມລາວ ທີ ນະຄອນຫຼວງວຽງຈັນ ເຊິິ່ງມີຈຸດປະສົງເພື່ອເພີ່ມທະວີການຮ່ວມມື, ລາຍງານຜົນສຳເລັດວຽກງານອົງການຈັດຕັ້ງສັງຄົມລາວ ແລະ ສົນທະນາແລກປ່ຽນກ່ຽວກັບບົດບາດ ແລະ ການປະກອບສ່ວນຂອງອົງການຈັດຕັັ້ງຈັດສັງຄົມລາວຕໍ່ກັບແຜນພັດທະນາເສດຖະກິດ-ສັງຄົມ ແລະ ການພັດທະນາປະເທດແບບຍືນຍົງ.

ກອງປະຊຸມໄດ້ຮັບກຽດການເປັນປະທານຂອງທ່ານ ນິສິດ ແກ້ວປັນຍາ ຮອງລັດຖະມົນຕີກະຊວງພາຍໃນ ແລະ ມີບັນດາຜູ້ເຂົ້າຮ່ວມຈາກຕາງພາກລັດຂັ້ນສູນກາງ, ພາກລັດຂັ້ນແຂວງ ແລະ ບັນດາອົງການຈັດຕັ້ງສັງຄົມ ຫຼາຍກ່ວາ 280 ທ່ານ. ກອງປະຊຸມດັ່ງກ່າວຍັງຖືເປັນໂອກາດໃຫ້ແກ່ບັນດາອົງການຈັດສັງຄົມລາວ ໄດ້ສະແດງຜົນສຳເລັດໃນການຈັດຕັັ້ງປະຕິບັດໂຄງການໃນໄລຍະທີ່ຜ່ານມາ ໂດຍເນັ້ນໜັກເຖິງຄວາມພະຍາຍາມໃນການພັດທະນາຊຸມຊົນ ແລະ ສົ່ງເສີມແນວຄວາມຄິດລິເລີ່ມໃນວຽກງານພັດທະນາ.

ການພົບປະຄັ້ງນີ້ແມ່ນເປັນບາດກ້າວທີ່ສຳຄັນຕໍ່ການເພີ່ມທະວີການພົວພັນ ແລະ ເຮັດວຽກຮ່ວມກັນໃຫ້ດີຂື້ນ. ເພື່ອເຮັດໃຫ້ ການເຮັດວຽກຮ່ວມກັນໃຫ້ດີຂື້ນ, ພາກລັດ ແລະ ອົງການຈັດຕັ້ງສັງຄົມລາວ ເປັນຜູ້ປູທາງເພື່ອການພັດທະນາແບບມີສ່ວນຮ່ວມ ແລະ ຍືນຍົງໃນອະນາຄົດ.

ແຜນງານ CEGGA ເປັນແຜນງານຮ່ວມຂອງທີມເອີຣົບ ເຊິ່ງໄດ້ຮັບການສະໜັບສະໜູນຈາກລັດຖະບານສະວິສເຊີແລນ ແລະ ລັດຖະບານເຢຍລະມັນ ແລະ ສະຫະພາບ ເອີຣົບ. ຈັດຕັ້ງປະຕິບັດໂດຍຈິໄອແຊັດ (GIZ) ຮ່ວມມືກັບກະຊວງພາຍໃນ ແລະ ກະຊວງຍຸຕິທຳ, ສະພາແຫ່ງຊາດ, ແລະ ​ຄະນະປະສານງານອົງການຈັດຕັ້ງສັງຄົມລາວ.