ຍົກສູງພາວະຄວາມເປັນຜູ້ນຳໃຫ້ແກ່ສະມາຊິກສະພາ ແລະ ພະນັກງານ ເພດຍິງ ສະພາແຫ່ງຊາດ ແລະ ປະຊາຊົນຂັ້ນແຂວງ
ສະມາຊິກສະພາ ແລະ ພະນັກງານ ເພດຍິງ ສະພາແຫ່ງຊາດ ແລະ ປະຊາຊົນຂັ້ນແຂວງ ຄຳມ່ວນ ແລະ ຫຼວງພະບາງ ໄດ້ຮັບການຝືກອົບຮົມກ່ຽວກັບພາວະຄວາມເປັນຜູ້ນຳ ແລະ ທັກສະທີ່ເປັນຍຸດທະສາດ. ການຝຶກອົບຮົມໄດ້ຈັດຂື້ນໃນລະຫວ່າງວັນທີ6-7 ພຶດສະພາ 2024 ທີ່ນະຄອນຫຼວງວຽງຈັນ ໂດຍການນຳພາຂອງຫ້ອງການກະຊວງພາຍໃນ ແລະ ພາຍໃຕ້ການສະໜັບສະໜູນໂດຍແຜນງານ CEGGA ໄລຍະ II.
ຈຸດປະສົງຂອງການຝຶກອົບຮົມຄັ້ງນີ້ ແມ່ນເພື່ອເຮັດໃຫ້ສະມາຊິກສະພາ ແລະ ພະນັກງານ ເພດຍິງ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃຫ້ມີທັກສະຄວາມເປັນຜູ້ນໍາ, ມີເຄື່ອງມື ແລະ ມີຍຸດທະສາດທີ່ຈຳເປັນ ເພື່ອສົ່ງເສີມຄວາມກ້າວໜ້າຄວາມເປັນຜູ້ນໍາເພດຍິງ ແລະ ການເສື່ອມສານບົດບາດຍິງ-ຊາຍໃນວຽກງານຂອງສະພາ. ພ້ອມທັງເປັນການເພີ່ມທະວີການຕະໜັກເຖິງບົດບາດຍິງ-ຊາຍໃນຂະບວນການຕັດສິນບັນຫາໃນວຽກງານສະພາໂດຍສະເພາະກິດຈະກຳການມີສ່ວນຮ່ວມຂອງປະຊາຊົນເຊັ່ນ: ວຽກງານສາຍດ່ວນ, ພິຈະລາຄຳຮ້ອງຂໍຄວາມເປັນທຳ, ການປຶກສາຫາລື, ການລົງພົບປະປະຊາຊົນ, ແລະ ການຕິດຕາມກວດກາ.
ບັນດາຜູ້ເຂົ້າຮ່ວມໄດ້ແລກປ່ຽນປະສົບການ, ບົດຮຽນທີ່ດີ ແລະ ສິ່ງທ້າທາຍໃນການສົ່ງເສີມພາວະຄວາມເປັນຜູ້ນໍາຂອງເພດຍິງພາຍຢູ່ໃນສະຖາບັນ ແລະ ເຂດເລືອກຕັ້ງຂອງຕົນ. ການແລກປ່ຽນປະສົບການ ແລະ ການປັບໃຊ້ບົດຮຽນທີ່ດີ ແລະ ການສ້າງເຄືອຂ່າຍເພື່ອການແລກປ່ຽນ ຈະເຮັດໃຫ້ ສະມາຊິກສະພາປະຊາຊົນຂ້້ນແຂວງ ແລະ ພະນັກງານ ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ສາມາດສືບຕໍ່ເສີມສ້າງຂີດຄວາມສາມາດເຊິ່ງກັນ ແລະ ກັນ ແລະ ສົ່ງເສີມຄວາມສະເໝີພາບລະຫວ່າງຍິງ-ຊາຍ.
ແຜນງານ CEGGA ເປັນແຜນງານຮ່ວມຂອງທີມເອີຣົບ ເຊິ່ງໄດ້ຮັບການສະໜັບສະໜູນຈາກລັດຖະບານສະວິສເຊີແລນ ແລະ ລັດຖະບານເຢຍລະມັນ ແລະ ສະຫະພາບ ເອີຣົບ. ຈັດຕັ້ງປະຕິບັດໂດຍຈິໄອແຊັດ (GIZ) ຮ່ວມມືກັບກະຊວງພາຍໃນ ແລະ ກະຊວງຍຸຕິທຳ, ສະພາແຫ່ງຊາດ, ແລະ ຄະນະປະສານງານອົງການຈັດຕັ້ງສັງຄົມລາວ.
