ກອງປະຊຸມແລກປ່ຽນຄັ້ງທຳອິດລະຫວ່າງສະພາປະຊາຊົນແຂວງຄຳມ່ວນ-ແຂວງຫຼວງພະບາງ, ແລະ ບັນດາອົງການຈັດຕັ້ງສັງຄົມລາວ
ວັນທີ 03 ເມສາ 2024, ກອງປະຊຸມແລກປ່ຽນຄັ້ງທຳອິດ ໄດ້ສ້າງຂີດໝາຍອັນສຳຄັນໃນການເພີ່ມທະວີການຮ່ວມມື ແລະ ການແລກປ່ຽນລະຫວ່າງສະພາປະຊາຊົນຂັ້ນແຂວງ(ສພຂ) ແລະ ບັນດາອົງການຈັດຕັ້ງສັງຄົມລາວຂັ້ນທ້ອງຖິ່ນ. ເປັນເວທີເພື່ອຊຸກຍູ້ສົ່ງເສີມການພົວພັນ ແລະ ສ້າງຄວາມໄວ້ເນື້ອເຊື່ອໃຈລະຫວ່າງ ສະພາປະຊາຊົນຂັ້ນແຂວງ ແລະ ບັນດາອົງການຈັດຕັ້ງສັງຄົມ, ໂດຍເນັ້ນໃສ່ການຊຸກຍູ້ສົ່ງເສີມວຽກງານດ້ານຄວາມສະເໝີພາບລະຫວ່າງຍິງ-ຊາຍ ແລະ ການຮັກສາສິ່ງແວດລ້ອມເຊິ່ງເປັນໜຶ່ງບູລິມະສິດຫຼັກໃນການສະໜັບສະໜູນເປົ້າໝາຍການພັດທະນາຂອງ ສປປ ລາວ. ກອງປະຊຸມດັ່ງກ່າວໄດ້ຮັບການສະໜັບສະໜູນຈາກແຜນງານ CEGGA II ຊຶ່ງເປັນສ່ວນໜຶ່ງຂອງຈຸດປະສົງຂອງແຜນງານ ເພື່ອເພີ່ມທະວີການພົວພັນລະຫວ່າງປະຊາຊົນກັບພາກລັດເພື່ອການພັດທະນາແບບມີສ່ວນຮ່ວມ ແລະ ຍືນຍົງ.
ໃນກອງປະຊຸມຄັ້ງນີ້, ທ່ານ ສົມພອນ ສີອຸດົມພັນ, ຮອງປະທານ ສພຂ ແຂວງຫຼວງພະບາງ ແລະ ທ່ານ ບົວພັນ ແສງຈັນ ຮອງປະທານ ສພຂ ແຂວງຄໍາມ່ວນ ໄດ້ເນັ້ນໜັກເຖິງການຮັບຮູ້ບົດບາດຂອງອົງການຈັດຕັ້ງສັງຄົມທີລະບຸໄວ້ໃນລັດຖະທຳມະນູນ ແລະ ໄດ້ຍົກໃຫ້ເຫັນວ່າ ບັນດາອົງການຈັດຕັ້ງສັງຄົມຄວນມີການປະກອບສ່ວນໃນການສະໜອງຂໍ້ມູນກ່ຽວກັບຮ່າງກົດໝາຍ ແລະ ໄດ້ປະກອບສ່ວນຢ່າງຕັ້ງໜ້າ ໃນກອງປະຊຸມປຶກສາຫາລືກ່ອນຮ່າງກົດໝາຍຈະໄດ້ຮັບຮອງ. ບັນດາຜູ້ເຂົ້າຮ່ວມໄດ້ປຶກສາຫາລືຢ່າງກົງໄປກົງມາ ແລະ ຊຸກຍູ້ການເພີ່ມທະວີການປະສານງານລະຫວ່າງ ສະພາປະຊົນຂັ້ນແຂວງ, ສະພາແຫ່ງຊາດ, ອົງການຈັດຕັ້ງສັງຄົມ ໂດຍຜ່ານຄະນະປະສານງານອົງການຈັດຕັ້ງສັງຄົມລາວ ແລະ ບັນດາອົງການຈັດຕັ້ງລັດທີ່ກ່ຽວຂ້ອງເຊັ່ນ: ຂັ້ນກະຊວງ ແລະ ພະແນກພາຍໃນແຂວງ. ການປະສານງານນີ້ມີຈຸດປະສົງເພື່ອອໍານວຍຄວາມສະດວກໃຫ້ການສົນທະນາ ແລະ ການຮ່ວມມືເພື່ອແກ້ໄຂບັນຫາທີ່ມີຜົນກະທົບຕໍ່ຊຸມຊົນຂັ້ນທ້ອງຖິ່ນ, ທີ່ຈະເຮັດໃຫ້ອົງການຈັດຕັ້ງສັງຄົມໄດ້ປະກອບສ່ວນຄວາມເຂົ້າໃຈ ແລະ ຄຳຄິດເຫັນຕໍ່ບັນຫາດັ່ັງກ່າວຢ່າງມີປະສິດທິພາບ.
ແຜນໃນຕໍ່ໜ້າ, ສພຂ ແລະ ອົງການຈັດຕັ້ງສັງຄົມ ຈະສະເຫນີການສະຫນັບສະຫນູນຢ່າງຕໍ່ເນື່ອງຈາກແຜນງານ CEGGA ເພື່ອຈັດກອງປະຊຸມແລກປ່ຽນຢ່າງຫນ້ອຍຫນຶ່ງຄັ້ງຕໍ່ປີ ເພື່ອຮັບປະກັນການມີສ່ວນຮ່ວມຢ່າງຕໍ່ເນື່ອງ ແລະ ເພື່ອໃຫ້ບັນລຸຈຸດປະສົງຮ່ວມກັນ. ກອງປະຊຸມແລກປ່ຽນຄັ້ງນີ້ຍັງໄດ້ເນັ້ນໜັກເຖິງພາລະບົດບາດລວມຂອງ ສພຂ ແລະ ອົງການຈັດຕັ້ງສັງຄົມ ໃນການຮ່ວມມືໃນວຽກງານການປົກຄອງ ແລະ ການສ້າງຄວາມເຂັ້ມແຂງໃຫ້ແກ່ຊຸມຊົນ, ເພີ່ມທະວີການພັດທະນາປະເທດຊາດ ແບບມີສ່ວນຮ່ວມ ແລະ ຍືນຍົງ.
ແຜນງານ CEGGA ເປັນແຜນງານຮ່ວມຂອງທີມເອີຣົບ ເຊິ່ງໄດ້ຮັບການສະໜັບສະໜູນຈາກລັດຖະບານສະວິສເຊີແລນ ແລະ ລັດຖະບານເຢຍລະມັນ ແລະ ສະຫະພາບ ເອີຣົບ. ຈັດຕັ້ງປະຕິບັດໂດຍຈິໄອແຊັດ (GIZ) ຮ່ວມມືກັບກະຊວງພາຍໃນ ແລະ ກະຊວງຍຸຕິທຳ, ສະພາແຫ່ງຊາດ, ແລະ ຄະນະປະສານງານອົງການຈັດຕັ້ງສັງຄົມລາວ.