ສ້າງຄວາມເຂັ້ມແຂງໃຫ້ແກ່ຊາວບ້ານໃນການປົກປັກຮັກສາປ່າໄມ້ໃນແຂວງຄຳມ່ວນ
_rdax_493x370.png)
ໃນປີ 2023, ແຜນງານ CEGGA II ໄດ້ສະໜັບສະໜູນທຶນຂະໜາດໜ້ອຍໃຫ້ແກ່ອົງການຈັດຕັ້ງສັງຄົມລາວ (CSOs) ຈຳນວນ 23 ອົງກອນເພື່ອຈັດຕັ້ງປະຕິບັດໂຄງການຢູ່ໃນ 11 ແຂວງ, ພ້ອມທັງສ້າງຄວາມເຂັ້ມແຂງໃຫ້ອົງການຈັດຕັ້ງສັງຄົມ ຈັດຕັ້ງປະຕິບັດບັນດາໂຄງການທີ່ແນໃສ່ການຊຸກຍູ້ການພັດທະນາເສດຖະກິດ-ສັງຄົມແບບກວມລວມ ແລະ ປັບປຸງຊີວິດການເປັນຢູ່ຂອງປະຊາຊົນ. ສະມາຄົມຊຸມຊົນເພື່ອຊີວິດ ແລະ ສິ່ງແວດລ້ອມ ເປັນອົງກອນໜຶ່ງທີ່ໄດ້ຮັບທຶນຊ່ວຍເຫຼືອລ້າຂະຫນາດໜ້ອຍຂອງແຜນງານ CEGGA II ເພື່ອຈັດຕັ້ງປະຕິບັດໂຄງການໃນການຄຸ້ມຄອງປ່າໄມ້ບ້ານ ເພື່ອການພັດທະນາທີ່ຍືນຍົງ ໃນສາມບ້ານຄື; ບ້ານນາໝາກບ້າ, ບ້ານນາຮິ ແລະ ບ້ານໂນນແດງ ເມືອງ ມະຫາໄຊ ແຂວງຄຳມ່ວນ.
ໂດຍມີວິໄສທັດທີ່ຈະແຈ້ງ ແລະ ປະຕິບັດໜ້າວຽກຢ່າງຕັ້ງໜ້າ, ສະມາຄົມຊຸມຊົນເພື່ອຊີວິດ ແລະ ສິ່ງແວດລ້ອມໄດ້ເລີ່ມດຳເນີນການເຄື່ອນໄຫວກິດຈະກຳເພື່ອສົ່ງເສີມການມີສ່ວນຮ່ວມຂອງປະຊົນໃນການປົກປັກຮັກສາປ່າໄມ້ ແລະ ການພັດທະນາແບບຍືນຍົງ. ໂຄງການດັ່ງກ່າວມີເປົ້າໝາຍເພື່ອເພີ່ມພື້ນທີ່ປ່າໄມ້ຂື້ນ 75 % ແລະ ເພື່ອຮັບປະກັນການຟື້ນຟູປ່າໄມ້ ແລະ ເພີ້ມຄວາມອຸດົມສົມບູນຂອງປ່າໄມ້ເຊິ່ງເປັນແຫຼ່ງຊັບພະຍາກອນໃນການຮັກສາແມ່ນ້ຳ ແລະ ດິນແຫ້ງແລ້ງຄືນໃໝ່. ພ້ອມດ່ຽວກັນນັ້ນ, ຍັງຮັບປະກັນຄວາມອຸດົມສົມບູນດ້ານສະບຽງອາຫານໃຫ້ແກ່ຊາວບ້ານທ້ອງຖິ່ນ ແລະ ເປັນການປ້ອງກັນຜົນກະທົບຈາກການປ່ຽນແປງຂອງດິນຟ້າອາກາດ. ຜ່ານການເຄື່ອນໄຫວຈັດຕັ້ງປະຕິບັດກິດຈະກຳຂອງຊຸມຊົນຢ່າງຕັ້ງໜ້າ,ຊາວບ້ານຫຼາຍກ່ວາ 100 ຄົນ ແລະ ພະນັກງານລັດຂ້້ນທ້ອງຖິ່ນໄດ້ເຕົ້າໂຮມກັນເພື່ອປຶກສາຫາລືກ່ຽວກັບການປະຕິບັດການຄຸ້ມຄອງທີ່ດິນ ແລະ ປ່າໄມ້, ແລກປ່ຽນຄວາມເຂົ້າໃຈກ່ຽວໜ້າທີ່ຮັບຜິດຊອບການປົກປັກຮັກສາປ່າໄມ້.
ຜົນສຳເລັດອັນສຳຄັນອັນໜຶ່ງຂອງໂຄງການແມ່ນການປູກຈິດສຳນຶກໃຫ້ແກ່ຊາວບ້ານກ່ຽວກັບກົດໝາຍ ແລະ ລະບຽບການອະນຸລັກປ່າໄມ້. ໂດຍການໃຫ້ຊຸມຊົນມີຄວາມຮູ້ ແລະ ມີເຄື່ອງມືໃນການກໍານົດ ແລະ ປົກປັກຮັກສາປ່າໄມ້ປະເພດຕ່າງໆ, ເຊິ່ງເຮັດໃຫ້ຊາວບ້ານໄດ້ກາຍເປັນຜູ້ປົກປັກຮັກສາທໍາມະຊາດຢ່າງຫ້າວຫັນ. ການປູກຈິດສຳນຶກນີ້ ບໍ່ພຽງແຕ່ເປັນການສະກັດກັ້ນການຕັດໄມ້ທຳລາຍປ່າ ແຕ່ຍັງເປັນການສົ່ງເສີມຄວາມຮັບຜິດຊອບແບບລວມ, ບັນດາບ້ານເປົ້າໝາຍໄດ້ມີການແບ່ງເຂດປ່າສະຫງວນຢ່າງຕັ້ງໜ້າ ແລະ ປົກປັກຮັກສາເພື່ອບໍ່ໃຫ້ມີການບຸກລຸກທຳລາຍປ່າໄມ້.
ໂຄງການນີ້ເປັນຫນຶ່ງໂຄງການທີ່ໄດ້ຮັບສະຫນັບສະຫນູນຈາກແຜນງານ CEGGA. ຜ່ານການໃຫ້ທຶນຊ່ວຍເຫຼືອລ້າ ແລະ ຄວາມພະຍາຍາມສ້າງຄວາມອາດສາມາດດ້ານອົງກອນ, ຍັງມີບັນດາອົງການຈັດຕັ້ງສັງຄົມຈຳນວນຫຼາຍທີ່ເຄື່ອນໄຫວກິດຈະກຳທີ່ຄືກັນກັບສະມາຄົມຊຸມຊົນເພື່ອຊີວິດ ແລະ ສິ່ງແວດລ້ອມ. ການຮ່ວມມືກັນ, ອົງການຈັດຕັັ້ງສັງຄົມສາມາດສ້າງຄວາມແຕກຕ່າງອັນຍິງໃຫຍ່ໃຫ້ແກ່ຊຸມຊົນຂອງຕົວເອງໄດ້, ຊ່ວຍເຫຼືອທຸກປະຊາຊົນ, ໂດຍສະເພາະກຸ່ມຜູ້ທີ່ດ້ອຍໂອກາດ, ເຮັດໃຫ້ຊີວິດການເປັນຢູ່ດີຂື້ນກວ່າເກົ່າ ແລະ ປົກປັກຮັກສາສິ່ງແວດລ້ອມໃນອະນາຄົດ.
ສະແດງຄວາມຂອບໃຈຕໍ່ການປະຕິບັດຫນ້າວຽກຢ່າງຕັ້ງໜ້າຂອງສະມາຄົມຊຸມຊົນເພື່ອຊີວິດ ແລະ ສິ່ງແວດລ້ອມ ແລະ ການສະໜັບສະໜູນຂອງແຜນງານ CEGGA II, ຊາວບ້ານບ້ານນາໝາກບ້າ, ບ້ານນາຮິ ແລະ ບ້ານໂນນແດງ ເມືອງ ມະຫາໄຊ, ແຂວງຄຳມ່ວນ ໄດ້ຫັນມາເປັນຜູ້ປົກປັກຮັກສາປ່າໄມ້ໃຫ້ດີຂຶ້ນ, ເພື່ອເຮັດໃຫ້ຮຸ່ນລູກຮຸ່ນຫຼານສາມາດສືບຕໍ່ໄດ້ຮັບຜົນປະໂຫຍດຈາກຊັບພະຍາກອນທຳມະຊາດອັນລ້ຳຄ່າເຫຼົ່ານີ້. ບົດຄວາມນີ້ໄດ້ຍົກໃຫ້ເຫັນວ່າເມື່ອຊຸມຊົນຮ່ວມມືກັນ, ພວກເຂົາສາມາດສ້າງຄວາມແຕກຕ່າງອັນຍິງໃຫຍ່ໃນການປົກປັກສາຮັກສິ່ງແວດລ້ອມ ແລະ ສ້າງອະນາຄົດທີ່ດີກວ່າໃຫ້ແກ່ທຸກໆຄົນ.
ແຜນງານ CEGGA ແມ່ນເປັນການລິເລີ່ມຮ່ວມມື ລະຫວ່າງ ລັດຖະບານ ແຫ່ງ ສປປ ລາວ ແລະ ຄູ່ຮ່ວມງານ “ທີມເອີຣົບ” ປະເທດສະວິສເຊີແລນ, ປະເທດເຢຍລະມັນ, ແລະ ສະຫະພາບເອີຣົບ. ອົງການ ຮ່ວມມືລາວ-ເຢຍລະມັນ Deutsche Gesellschaft fuer Internationale Zusammenarbeit (GIZ) ໄດ້ຖືມອບໝາຍໃຫ້ຈັດຕັ້ງປະຕິບັດ ແຜນງານການຮ່ວມມືຂອງທີມເອີຣົບ ຮ່ວມກັບ ຄູ່ຮ່ວມງານຝ່າຍ ລາວ ເພື່ອປະກອບສ່ວນເຂົ້າໃນການພັດທະນາສ້າງສາປະເທດຊາດ ໂດຍການເພີ້ມທະວີວຽກງານການປົກຄອງທີ່ດີ, ສິດທິມະນຸດ ແລະ ການສ້າງລັດທີ່ປົກຄອງດ້ວຍກົດໝາຍ.
